حدث عظيم كل الناس بتتكلم عنه ومستنياه بفارغ الصبر، العالم كله هيتفرج على عظمة الأجداد اللي بنوا التاريخ والحضارة، والأحفاد اللي بيكملوا المسيرة، ومستنيين يوم السبت الجاي 3 أبريل يشوفوا الموكب اللي هينقل مومياوات ملوك عظماء، ووزارة السياحة والآثار أطلقت برومو ترويجي عن متحف الفسطاط الجديد وعن الموكب والمومياوات اللي هيتم نقلهم، وشارك فيه نجوم زيّ حسين فهمي وآسر ياسين وأمينة خليل، تعالوا نشوف الفيديو ونعرف كل التفاصيل عن الحدث اللي العالم كله مستنيه.
في الموكب ده، هيتم نقل 22 مومياء لملوك وملكات مصريين، 18 ملك، و4 ملكات، منهم مومياوات الملك رمسيس التاني، اللي يعتبر من أشهر ملوك العصر الفرعوني، والملك سقنن رع، والملك تحتمس التالت، والملكة حتشبسوت، وميريت أمون زوجة الملك أمنحتب الأول والملكة نفرتاري زوجة الملك أحمس. والموكب هيبدأ من المتحف المصري في التحرير، وهيلف شوارع القاهرة ويمر بمحطات كتير مهمة ومختلفة تم تجهيزها على أعلى مستوي زيّ بحيرة عين الصيرة، علشان تليق بالموكب ده، لحد وصوله للمتحف القومي للحضارة المصرية في الفسطاط، وهتبان مظاهر الجمال المختلفة للأماكن اللي هيمر فيها الموكب.
الحدث العظيم ده هيغطيه 400 قناة عالمية لكل دول العالم، ومنهم قنوات أكدت إنها هتبث مباشر وقتها، على شاشات التلفزيون وكمان على الإنترنت، علشان العالم كله يقدر يتابع الحدث ده وكإنهم في الصورة الحية منه، والحدث هيشارك فيه طلبة وأطفال وفنانين مصريين زيّ يسرا ومنى زكي وحسين فهمي وآسر ياسين وهند صبري.
ولترويج السياحة في متحف الحضارة، هيتم تخفيض سعر التذاكر بنسبة 50% لمدة أسبوعين من يوم 4 لـ 17 أبريل، لزيارة قاعة العرض المركزي، وهيتم السماح بزيارة قاعة المومياوات الملكية بداية من يوم 17 أبريل، اللي هيوافق يوم التراث العالمي، بعد تجهيز القاعة ووضع المومياوات في فتارين العرض الخاصة بيها في خلال الأسبوعين اللي بعد عملية النقل.