مبدئيًا، لو فاكر إننا هنقولك نصايح بجد، يبقى أنت في المكان الغلط، اسمع حلقات أسامة منير أو اتفرجي على رضوى الشربيني، لكن احنا هنا جايين نهزر، بس نوعًا ما يعني هنناقش حلول بسيطة كده وحاجات نعملها بعد الفركشة، علشان نعدي اليومين دول بأقل خساير، لحد ما ربنا يكرمك وتتخطى المرحلة دي كلها. جدير بالذكر إن الفكرة دي جت لنا بعد ما شوفنا حد بيسأل على جروب للأكل، بيسأل الناس تقترح عليه ياكل إيه بعد ما فركش، فاحنا هنمشي على نفس الخطى.
تاكل إيه؟
في البوست اللي صاحبه سأل السؤال الجهنمي ده، أكتر تعليق كان ظاهر هو حد بيقوله “كُل في نفسك” بس احنا مش معاه خالص، ماتاكلش في نفسك لأ. ناس كتير لما بتكون في الموقف ده الموضوع بيقلب معاها بتطرف، يعني يا ياكل كتير جدًا، يا ماياكلش خالص، وده بيبقى نتيجة لاضطراب حالته المزاجية عادي، بس نصيحتنا إنك تحاول على قد ما تقدر تسيطر على الموضوع ده، علشان صحتك في الأول وفي الآخر، إنما لو ناوي تخرب الدنيا خالص، بننصحك تاكل حلويات علشان هتهون عليك كتير، وكُل اللي نفسك فيه حسب تفضيلك بقى، كافئ نفسك بالأكل لو ماحدش مقدرك، بس برضه بحساب.
تخرج فين
مبدئيًا، ابعد عن الأماكن اللي كنتوا بتخرجوا فيها سوا، علشان ماتقعدش تغني خدني الحنين بعد السنين جابني هنا، وتبوظ الخروجة وتنكد على أصحابك، جرب تخرج في أماكن جديدة مع أصحابك، أو حتى سافر سفرية صد رد، أو جرّب أماكن تعملوا فيها أنشطة أو ألعاب جديدة، ادخل سينما شوف أفلام جديدة، اسحل نفسك في قصص غير قصتك علشان مايبقاش في وقت تفكر في الذي مضى.
تسمع إيه
حتى لو أنت مش بتحب أغاني النكد، أو أصلًا مش بتحب المطربين اللي بيغنوا النوع ده، في الوقت ده هتبقى بتسمعهم وتحس إن في حاجة بتشدك ليهم، قاوم الاحساس ده وابعد عن تامر عاشور وشيرين وكل اللي ممكن يدوس على جرحك بأغانيه، وخليك في الأغاني الفرفوشة، ولو حبكت معاك يعني أغاني نكد، ماشي مش مشكلة طلّع فيهم طاقتك السلبية برضه ماتكتمش جواك، بس ماتغرقش فيهم يعني أغنية كده واجري.
تعمل/ي لون شعرك إيه
جرت العادة خصوصًا عند البنات، إنها أول ما بتفركش بتروح للكوافير، وتحس إنها عايزة تغير في شعرها، ماتفهمش إيه العلاقة بين الفركشة وتغيير شكل الشعر، بس لازم يا تقصه يا تغيّر لونه، بتنتقم من شعرها، أهي تجربة وتغيير برضه يمكن يفرق في نفسيتك، بس حاولي تتخيلي اللون قبل ما تعمليه وماتبعديش قوي بخيالك علشان لو شعرك باظ هتكتئبي أكتر، وبدل ما كان سبب واحد هيبقوا اتنين.
التعامل على السوشيال ميديا
ابعد على قد ما تقدر من الأفورة، ولا تفضل تنزل صور كتير وتعمل شير كتير، ولا تعتزلها خالص، الوسط حلو. علشان مايبقاش شكلك مثير للشفقة وأنت بتحاول تثبت أن أنت كويس وزي الفل، ولا تبقى بتلقح وتعمل شغل عيال، ولا برضه تعتزلها خالص، خليك في الوسط حلو. أما التعامل المباشر مع اللي فركشت معاه، ده يرجع لتفكيرك وشخصيتك لا هنقولك تعمل بلوك ولا هنقولك خليه.