في فترة الألفينات، كان في سحر خاص على الشاشة.. لما الكاميرا تجمع اتنين بنحس إن في بينهم كيمياء، ونصدق إنهم عايشين قصة حب بجد. دول هما الثنائيات الرومانسية أو زي ما بنحب نسميهم “كابلز “.
اللي خلوا قلوبنا تدق وعيوننا تدمع ونضحك ونحلم معاهم.. وعلشان نعيش اللحظات دي من تاني تعالوا نفتكر سوا أشهر الثنائيات اللي سابوا بصمة عايشة لحد النهارده.
لا تفوّت قراءة: لو لسه مفركش وقلبك مكسور.. شغّل الأغاني دي عشان تعيش الوجع
أحمد السقا ومنى زكي – ثنائي الألفية الذهبي
الثنائي ده يعتبر من أنجح وأقرب الثنائيات لقلب الجمهور، اشتغلوا مع بعض في 11 عمل ما بين مسرح، سينما وتليفزيون.
بدأت الحكاية بمسلسل “نصف ربيع الآخر” سنة 1996، وبعدها “زيزينيا”، وأول بطولة ليهم كانت في السهرة التلفزيونية “زواج على ورق سلوفان”.
أول فيلم جمعهم كان “صعيدي في الجامعة الأمريكية”، وبعدها قدموا أعمال فنية زي “عفروتو”، “أفريكانو”، “مافيا”، “كده أوكيه”، “عن العشق والهوى”، “تيمور وشفيقة”، “من 30 سنة”.
وفي معظم الأعمال دي قدموا لنا جرعات مختلفة من الرومانسية على اختلاف القصص وكانوا مثال يحتذى به في كابلز الألفينيات.
بس اللي خلانا نضيفهم ضمن القائمة الرومانسية بالتحديد هو “تيمور وشفيقة” و”أفريكانو” ده كفاية نطة السقا يا جماعة!
السقا أطيب بنى آدم أنا شفته فى حياتى، من أطيب الشخصيات وأكتر حد فى جيلنا منح فرص لفنانين فى بداية مشوارهم
منى زكي عن أحمد السقا
لا تفوت قراءة: حين يُروى الأدب بالكاميرا.. 7 روايات عربية تحولت إلى مسلسلات وأفلام
تامر حسني ومي عز الدين – عمر وسلمى وسلسلة من الرومانسية والتفاهم
العلاقة بين تامر ومي دايمًا كانت مبنية على تفاهم واضح، بيكملوا بعض بنظرات العيون زي ما قالت مي.
اشتغلوا سوا في سلسلة “عمر وسلمى” من 2007 لحد 2012، والثلاث أفلام حققوا نجاح كبير.
وكانوا اتجاه جديد في شكل الرومانسية والروشنة بالأغاني اللي غناها تامر خصوصًا في الجزء الأول من الفيلم.
وكان “فستان سلمى” حلم بنات كتير! كمان ظهروا في مسلسل “آدم” بس المرة دي بعيد عن الرومانسية وكان مليان دراما وألم.
علاقتى بتامر حسنى تتلخص فى قدرتنا على فهم بعضنا البعض بمجرد نظرات العيون.
مي عز الدين عن تامر حسني.
لا تفوّت قراءة: تامر حسني وبسمة بوسيل: دفتر صغير أشعل الحب والغيرة أنهته بالطلاق!
كريم عبد العزيز ومنى زكي .. ولكل عاشق وطن!
أول لقاء بينهم كان في “اضحك الصورة تطلع حلوة”، وقدموا قصة حب رغم فرق الطبقات.
بعدها رجعوا في “ليه خليتني أحبك” سنة 2000، وهو فيلم رومانسي كوميدي وبين لنا إن مفيش حاجة اسمها إن الأكس ترجع لحياتك تاني كصديقة!
حققوا نجاح كبير كمان في “أبو علي” سنة 2005 وعملوا وقتها ثنائي رومانسي يدوب القلوب بخفة دم ولطافة، وبروز القصة صوت مدحت صالح في أغنية “لكل عاشق وطن “
وكانت آخر مرة ظهروا سوا في فيلم “ولاد العم” سنة 2009 لكن بعيد عن الرومانسية، فقدموا أداء درامي متناغم.
كريم عبد العزيز فنان رجله على الأرض، وحاسس بنبض الناس، احنا زمايل كفاح، وفيه بيننا فعلا إحساس، إنه صديق رحلة حب الفن، عمرنا ما بنقعد مع بعض سواء بنشتغل أو مش بنشتغل إلا لازم نتكلم عن شغلنا، أكتر حاجة بيحب يتكلم عنها هو الفن.
منى زكي عن كريم عبد العزيز
أحمد حلمي ودنيا سمير غانم – ثنائي الكوميديا والرومانسية
الثنائي ده من ألذ الدويتوهات الفنية الرومانسية الكوميديا، اشتغلوا سوا في فيلم “إكس لارج”، وده كان بداية اللي خلت الناس تاخد بالها من الكيمياء بينهم على الشاشة.
وعلشان كده عملوا بعدها مسلسل إذاعي رمضاني “مين معايا”.
وآخر تعاون بينهم كان في فيلم “لف ودوران”. الكوميديا والرومانسية معاهم لها طعم خاص.
لا تفوّت قراءة: أصالة وفائق حسن.. حكاية حب تحولت إلى زواج في يوم واحد!
منة شلبي وأحمد عز – ثنائي متنوع!
أول تعاون بينهم كان في فيلم “شباب تيك أواي” سنة 2004، كانوا هما الاتنين لسه صغيرين وقاموا بدور عصافير الحب.
بعدين رجعوا في فيلم “بدل فاقد” سنة 2009، اللي كان مليان أكشن وتشويق.
وفضلوا لحد سنة 2022 لما اشتغلوا مع بعض في فيلم “الجريمة”، وكل مرة بيجمعهم عمل بيكون مختلف ومميز.
لا تفوت قراءة:
المسلسل الأبرز على نتفليكس.. لماذا يجب أن تضيف “كتالوج” إلى قائمة مشاهداتك فورا؟
خالد سليم وداليا البحيري – ثنائي الألفينات الصيفي!
في سنة 2004، قدموا فيلم “كان يوم حبك”، وكانت قصة حب شاعرية وجميلة بين الفنان والبحار والشاعر علي وبين ليالي.
وفي نفس السنة قدموا “سنة أولى نصب”، اللي دمج الرومانسية وسط أجواء صيف الغردقة، وبقينا كل لما نحب نحس بنسمة هوا في الصيف مخلوطة بأغاني حلوة نشغل سنة أولى نصب!
لا تفوت قراءة: حروب القمة في الغناء العربي: من زمن أم كلثوم وعبدالحليم إلى عمرو دياب وتامر حسني
مصطفى قمر وياسمين عبد العزيز – ثنائي اللايت كوميدي
ثنائي خفيف الدم، بيجمع بين الكوميديا والرومانسية. اشتغلوا مع بعض في “قلب جريء” سنة 2002.
لكن الفيلم اللي ساب بصمة مهمة عند الجمهور واعتبرهم من بعده من ألطف كابلز الألفينات كان فيلم”حريم كريم” سنة 2005.
وبعد نجاحه اتعاونوا مع بعض في “عصابة الدكتور عمر” سنة 2007.
كل أفلامهم كانت خفيفة ومحبوبة من الجمهور، ومناسبة لأي وقت تحب تضحك فيه وتستمتع.
