ساعات تقدير الناس لنا بيبقى نابع من تقديرنا لنفسنا والطريقة اللي بنتعامل بيها معاها، وعلشان تعيش في حياة مفيهاش صراعات نفسية ومليانة بالسلام الداخلي لازم تتقبل نفسك وتصاحبها، من خلال حاجات تعملها وتقولها لنفسك.
حب نفسك تحت أي ظرف هي عليه
يعني مش معنى إنك عندك عيوب وبتغلط زيّ أي حد بيغلط، إنك ماتحبش نفسك! أو إنك تخلي حبك وتقديرك لنفسك مرهون ومشروط بحاجات معينة لو اتحققت يبقى أنا كده أستاهل إني أتحب! المفروض نحب نفسنا تحت أي حال وأي ظرف، واحنا في مراحل فشلنا قبل نجاحنا.
بطل تجلد نفسك
ماتستناش الناس تسامحك علشان تبدأ تسامح نفسك، لو فضلت تجلد نفسك على أي حاجة بتعملها مش هتعرف تكمل، وهيتحول نطرتك لنفسك لشيء من الدونية والتحقير لها على أي غلطة، اللي لازم تعمله هو إنك تتصالح مع فكرة إنك غلطت وتبدأ تتعلم من الغلطات وتحاول تصلحها.
إدي وقت لنفسك
قضي وقت معاها وأنت بتعمل حاجة بتحبها حتى لو كانت بسيطة بس هتفرق معاك، اشرب القهوة اللي بتحبها، شوف فيلم بتحبه، اقرأ كتاب، اتكلم معاها! أه الكلام مع النفس مهم جدًا، إنك تسمع الأفكار اللي بتدور في دماغك كإنك شايفها قدامك وده هيخليك تتعامل معاها بوعي أكتر.
قدرها التقدير اللي تستحقه
عامل نفسك بالطريقة اللي تحب كل الناس يعاملوك بيها، احترم وقتك، وماتحطش نفسك في مقارنة مع حد بشكل يقلل منها، وماتجيش على نفسك وعلى صحتك النفسية علشان ترضي غيرك!
فكرها بالإنجازات اللي عملتها حتى لو صغيرة
مهم إنك تفكرها بالإنجازات اللي عملتها في لحظات الفشل قبل النجاح، علشان هي اللي بتدينا دافع إننا نكمل تاني ونقف على رجلينا.
بطل تحاول تبقى مثالي طول الوقت
إنك ترهقها ذهنيًا وجسديًا علشان تبقى مثالي في كل حاجة، حاجة شبه مستحيلة، والأحسن إنك تتقبل عيوبك قبل مميزاتك وتحاول تصلحها. لإن مفيش حد كامل وحد مش كامل، بس في حد قابل فكرة إنه مش مثالي وحد مش قادر يتقبل الفكرة وداخل طول الوقت في حرب مع نفسه.
ماتقللش من أحلامك
ومن ضمن الحاجات برضه، إنك تحترم أحلامك وتقدرها حتى لو كانت بسيطة وماتسمحش لحد يقلل أو يتفه منها، لإن جزء من احترامك وتقديرك لنفسك هو احترامك لأحلامك وطموحك، ولو أنت ماعتبرتهاش مهمة، الناس برضه هتعتبرها مش مهمة ومالهاش قيمة.
قول لنفسك “أنا كفاية”
بنمر بأوقات بنسأل نفسنا، هو أنا أستحق؟ هو أنا أستاهل؟ هو أنا كفاية؟ الغي كل الأفكار دي واستبدلها بـ”أه أنا كفاية”، و”أه أنا أستحق”. ,
في النهاية ماحدش هيقدرك غير لما أنت اللي تاخد الخطوة الأولى، ولو علاقتك بنفسك خربانة وبايظة وفيها مشاكل ده هينعكس على كل حياتك وفي طريقة تعاملك مع الناس اللي حوليك، فاعتبرها زيّ شخص تاني بتتعامل معاه، بس الفرق إن ده اللي باقي لك، غير أي حد تاني هيدخل حياتك وهو اللي هيكمل معاك، فاحترمه وقدره وبطل تجلده علشان صحتك النفسية.