رغم مرور شهور على وفاة النجم الكبير سمير غانم والفنانة العظيمة دلال عبد العزيز، لسه بناتهم دنيا وإيمي بيمروا بوقت صعب بسبب فراق والدهم ووالدتهم في وقت واحد. فكل فترة بينشروا على مواقع التواصل الاجتماعي صور بتجمعهم بوالديهم وبيكتبوا عليها كلمات مؤثرة عن قد إيه بيحبوهم وقد إيه مش قادرين يتحملوا فراقهم. ولإن أكيد الكل حزين عليهم وبيتمنى لهم راحة البال والصبر، فكرنا نكتب عن ازاى بشكل عام نقدر ندعم كل اللي بيمروا بأوقات صعبة بسبب موت أو فقدان حد عزيز، ونساعدهم يتخطوا الأزمة في وقت أقصر.
طبعًا الحزن والـ grief مرحلة أساسية لازم الشخص يمر بيها، علشان يقدر يخرج مشاعره وبعدها بالتدريج يقدر إنه يتخطاها. طريقة التعبير عن الحزن والفترة اللي بيحتاجها شخص علشان يقدر يرجع لحياته الطبيعية بتختلف من شخص للتاني، ولكن في حاجات ممكن تسهل عملية الحزن والـ moving on عليه، على الأقل ولو بنسبة بسيطة. وجزء كبير من العناصر اللي بتفرق، هو دعم ومساندة الناس المقربين. ودي حاجات جمعناها من مقالات طبية مختلفة، اللي ممكن تقوم بيها علشان تخفف الألم عن غيرك، ولو بنسبة بسيطة..
- خليك مستمع جيد واظهر الاهتمام بالتفاصيل حتى لو سمعتها أكتر من مرة
- ماتحاولش تنصح الشخص بحاجات يعملها وهو في عز الحزن، يكفي إنك تحتويه وممكن لما يهدى تبقى تقترح عليه حاجات يعملها علشان يخرج من اللي هو فيه
- التمس لهم الأعزار وتقبل مزاجهم المتقلب في الفترة دي
- قوم بالمساعدات العملية، زيّ إنك تساعد في توضيب البيت، تجهيز الأكل وغيرها من الحاجات اللي ممكن تكون بسيطة ولكن هما ممكن مايبقاش عندهم الطاقة على القيام بيها في الوقت ده.
- ماتقارنش موقفهم بمواقف ناس تانية فقدوا شخص، لإنهم بنسبة كبيرة مش هيكونوا قادرين يسمعوا، إلا لو هتتكلم عن ازاي الشخص ده قدر يتخطى الأزمة.
- احترم رغبتهم لما يكونوا مش حابين يتكلموا في الموضوع واكتفي بإنك تكون حاضر معاهم بس
- اعترف إن هما في أمر مش سهل، ولكن بالإيمان والصبر ربنا هيصبرهم.
- نصحهم وتشجيعهم على زيارة استشاري نفسي في حالة احتياجهم لده.
- اسأل عليهم بصورة مستمرة واظهر لهم قد إيه أنت مهتم، وإنهم مش حمل عليك.
موت أقرب الناس من أقسى التجارب اللي ممكن الإنسان يمر بيها (لو ماكانتش أقساهم)، ولكن مع دعم الآخرين وبالتصبر وبمرور الوقت، الألم أكيد مش بيختفي، ولكنه بيفضل يخف تدريحيًا..