من الحاجات اللي دايمًا بتصادف فيها مواقف من عجائب وغرائب وطرائف الدنيا، مقابلات الشغل اللي بنقضي نص حياتنا فيها، بنجرب ونقدم على وظائف كتير وياما شوفنا وقابلنا مواقف غريبة ومضحكة، سواء الموقف حصل بسببنا أو كان موقف غريب من الإتش آر أو صاحب الشركة نفسه، وبما إن الموضوع شيق، حبينا نعرف قصص مختلفة من الناس لأغرب مواقف اتعرضوا لها في مقابلات شغل.
صاحب الشركة بيحكي عن إنجازاته
أنت مفروض جايبني علشان تسمع مني، تسألني وأجاوبك علشان تقدر تحدد أنفع للشركة ولا لأ، ليه الموضوع يقلب بحكايات شبه حكايات الدكاترة من نوعية “لما كنت في ألمانيا”؟ ده اللي حصل مع يمنى. وبتقول: “روحت أقدم على وظيفة، وعديت من أول مقابلة، لكن في المقابلة التانية لقيت صاحب الشركة قعد يحكيلي عن إنجازاته وقد إيه هو راجل مكافح وبيشتغل من وهو عنده 16 سنة، أنا كنت مستنية إني أقعد مع صاحب الشركة ويسألني بقى أسئلة معقدة ولا يوترني ولا حاجة، الحمدلله ماكملتش إجابتين على بعض، وبقيت أنا اللي بسمعه”.
الكاريزما في ذمة الله
دنيا بتحكي لنا: “وأنا رايحة المقابلة، داخلة بكل ثقة في النفس ولابسة ومتشيكة وكله تمام، وأنا داخلة لمكتب المدير اتكعبلت في ترابيزة إزاز واتقلبت على وشي، وبدل ما أبقى رسمت صورة ذهنية عند الناس في الشركة وانطباع كويس، بقوا يطمنوا عليا حصل لي عاهة مستديمة ولا لأ، وكان نفسهم يولعوا فيا إني كسرت ترابيزة بعشروميت ألف جنيه جايبها صاحب الشركة من مغامرات في اسكتلندا.. وطبعًا مش محتاجة أقول لكم إني ماتقبلتش في الوظيفة”.
كام عدد الخلفاء الراشدين؟
معز بيحكي: “من كام يوم كنت في مقابلة في مدرسة علشان اشتغل بس كانت جماعي شوية اللي هو كنا حوالي 15 مدرس من كل التخصصات ومدير المدرسة ووكيل المدرسة وصاحب المدرسة قاعدين بيسألوا واللي يجاوب بقى، مدير المدرسة سأل سؤال بيقول كم عدد الخلفاء الراشدين؟ أنا قولت 4 جواب بديهي مش محتاج بنص جنيه تفكير. في مُدرسة زودت عليا قالت إن في بعض المؤرخين اعتبر عمر بن عبد العزيز هو الخليفة الخامس من الخلفاء الراشدين، أنا سخنت بقى أنتي جاية في ملعبي، فقولتلها ورد عليهم الطبري قال إن الأحق باللقب ده هو “الحسن بن علي” مش “عمر بن عبد العزيز ” علشان هو فعلًا الخليفة الخامس. مدير المدرسة ساب كل ده وقال أنتم الاتنين غلط. أنا سرحت شوية قولت غلط ازاي هما 7 يعني ولا إيه، قال لنا الخلفاء الراشدين هو واحد بس سيدنا أبو بكر الصديق، هو قال كده وياريته ما كان نطق ولا أتكلم، أنا جالي صدمة شوية كده قولت له معلش ازاي يعني 4 بقوا 1 فهمني، قال أصل الوحيد اللي اتسمى بالخليفة هو أبو بكر بس والباقي كانوا بيلقبوا بأمير المؤمنين. المشكلة مش هنا، المشكلة إن صاحب المدرسة ووكيل المدرسة محدش علق محدش قال له أنت بتقول إيه اسكت، المصيبة الأكبر إن مدير المدرسة ده كان موجه لغة عربية وماخدش باله إنهم اسمهم الخلفاء الراشدين مش الخليفة الراشدي مثلًا.”
الإتش آر الحنين رزق
“بعد ما جاب لي أزمة نفسية طلب لي حواوشي، أه والله. الإتش آر في أول مقابلة ليا في حياتي قعد يقول لي أسئلة معقدة ويلومني إن ازاي أنا لسه مش عارفة أنا عايزة إيه في الدنيا، وكلام كبار كده وأنا كنت لسه طالبة في الجامعة، بس الراجل لما لقاني اتوترت قال لي إيه ده لا استني، ولقيته خرج وجاب لي حواوشي، وقعدنا ناكل واحنا بنكمل الأسئلة كده، وبالمناسبة اتقبلت في الوظيفة”، ده اللي حكته رنا عن أول مقابلة عمل في حياتها.
أنا مش كريم أنا كرم
أماني حكت لنا “بعد ما قعدت وابتدينا اسئلة، لقيت إن الإتش آر بتكلمني في حاجات عن الحسابات أكتر مش عن الوظيفة اللي أنا مفروض جاية علشانها، قلت عادي يمكن بيختبروا شخصيتي في مجالات تانية يعني مايمنعش. بس لقيتها تعمقت في مجال الحسابات أكتر لحد ما حسيت إن في حاجة غلط، واكتشفت إنها بتتعامل معايا على أساس إني مقدمة في وظيفة الحسابات مش علاقات عامة”.