شهر مارس معروف إنه شهر المرأة، فيه يوم عيد الأم ويوم المرأة المصرية، والنهارده بتاريخ 8 مارس بنحتفل بيوم المرأة العالمي. وفكرنا لو هنحتفل النهارده هنحتفل ازاي؟ في حاجات كتير حصلت في الفترة الأخيرة من تمكين للمرأة أو تغليظ لعقوبات زيّ التحرش والختان وغيره. بس لقينا إن ممكن يكون أنسب احتفال للنهارده وللست، لو اتكلمنا عن قوالب التنميط اللي اتكسرت عند الستات وخصوصًا في الشغل! ستات اشتغلوا مهن كانوا بيقولوا عليها “ده شغل الرجالة” بس نجحوا فيها وعملوا الحاجة اللي بيحبوها!
أمل سيلمان – أول مأذونة شرعية
الفكرة جالت لها وقت لما شجعها جوزها إنها تقدم أوراق تعيين لمنصب مأذونة في الشرقية، بعد ما اتوفى عمه اللي كان بيشتغل نفس الوظيفة. في رحلة تقديم الأوراق لحد ما تم قبولها قابلت صعوبات وناس كتير وقفت ضدها، بس الداعمين كانوا أكتر وأولهم جوزها، لحد ما بقت أول مأذونة ست في مصر والوطن العربي بشكل رسمي!
نوران حسين – مهندسة بترول
الناس كانت بتسألها زمان نفسك تطلعي إيه؟ كانت بتقول عكس كل البنات “مهندسة بترول”، حلمها من الطفولة واتحقق بعد سنين. واجهت رفض كتير بسبب المجال وكان بيتقال ده شغل الرجالة، ومش هتلاقي شغل وهتعملي إيه لو اتجوزتي، وإيه اللي هيوديكي الصحرا تشتغلي هناك بالشهور! بس عملت زيّ فيلم للرجال فقط وقدرت إنها تثبت نفسها ورمت كل الكلام السلبي وراها.
ضحى محمد – أشهر ديليفري في مصر
كانت حابة تبعد عن الشغل التقليدي والروتيني وقعدة المكاتب وعدد ساعات الشغل الثابتة. ولقت شغفها بالصدفة في توصيل الطلبات، وعملت صفحة على الفيس بوك لأي بنت عايزة تستلم أي أوردر إنها توصله لها، وده هيبقى نوع من أنواع الأمان للبنات ولها كمان.
نيفين درويش – أول مصرية عربية قادت أكبر طائرة في العالم
برغم إن ده ماكانش مجال دراستها بس جريت ورا شغفها وحلمها من الطفولة. اسمها اتسجل في التاريخ كونها أول ست مصرية وعربية بتسوق طيارة إيرباص 380 واللي بتعتبر واحدة من أكبر طيارات العالم.
إنعام الأسود – أول سائقة في السعودية
بعد تطبيق قرار السماح للسيدات في المملكة بالسواقة، قدمت إنعام غازي الأسود على وظيفة سائقة في شركة “كريم” واتقبلت من بين 3000 ست اتقدموا للوظيفة، وكان في الوقت ده تعتبر أول ست تقدم علشان تبقى سائقة في السعودية.
لما تبص لمجموعة الستات دول، هتلاقي إن بقصصهم شجعوا ستات غيرهم إنهم يشتغلوا الشغل اللي بيحبوه، مش مهم الناس هتبص لهم ازاي أو هتقول عليهم إيه. المهم يبقوا مبسوطين!