في الوقت اللي فيه مشاهير كتير رفضوا يتكلموا عن موضوع الشاب اللي انتشر مؤخرًا على السوشيال ميديا لتحرشه بأكتر من ٥٠ بنت بالأدلة، بحجة إن “دي مش شغلانتهم” وإن في جهات تانية تتكلم عن الموضوع ده غيرهم، طلع على الساحة ممثلات ومشاهير مصريين كتير يستخدموا حساباتهم على السوشيال ميديا في تسليط الضوء عن ظاهرة التحرش والإعتداء الجنسي في الشارع المصري واستخدموا صفحاتهم عشان يخلوا صوت البنات اللي تم التحرش بيها يتسمع.
من أول الفنانات اللي اتكلموا عن قضية التحرش الأخيرة كانت سلمى أبو ضيف اللي دعت من خلال فيديو على الإنستجرام إلى معاقبة المتحرش عشان يكون عبرة لغيره، وقالت: «لازم الناس كلها تعرف إن اللي بيعمل حاجة غلط لازم يُعاقَب ويُحاسب عليها». و كمان نصحت الأهالي يسمعوا لبناتهم و بيطلوا يعنفوهم و يخوفوهم منهم لأنهم مصدر الأمان الأول ليهم و من غيرهم مش هيعرفوا يتصرفوا.
أما الإعلامية رضوى الشربيني فحرصت على التعليق على الموضوع و قالت في فيديو: ” البلد كلها معاكم اللى خايفة هروح معاها أى حتة”، كمان عرضت ترفع أي قضية على حسابها.
كمان الفنانة تارا عماد حرصت على توجيه رسالة شديدة اللهجة “إحنا زهقنا ولازم الحادثة الأخيرة تبقى عبرة لكل متحرش”.
بالنسبة لدينا داش صاحبة شركة Dash Management” المعروفة بخفة دمها و روحها الحلوة على السوشيال ميديا إلا ان مواقفها حادة و صريحة لما الموضوع يخص كرامة الستات عموماً، و عشان كده دينا مش بس اتكلمت عندها في الاستوريز، دينا نزلت فيديو بتحث كل الناس إنها تفضل ورا الموضوع ده لحد ما يحصل خطوة ايجابية و المتحرش يبقى عبرة لأي حد يحاول يتحرش ببنت.
من الناس اللي استخدموا مواقع التواصل الإجتماعي للتوعية كانت الممثلة الشابة لِلّا فضة اللي وضحت إن المتحرش المتداول صوره الأيام دي حاول التواصل معاها أكتر من مرة قبل كده وإنها متعاطفة جداً مع البنات وكان ممكن تكون أحد ضحاياه.
لكل واحدة مرت بتجربة قاسية زي تجربة التحرش في يوم من الأيام انتوا مش لوحدكم، كلنا في ضهركم و معاكم لحد ما أي حد يفكر يمس بنت يتحاسب أشد العقاب.