عيد الأم مناسبة بيستناها الأهالي والأولاد كل سنة علشان يعبروا بها عن حبهم واهتمامهم للأم. بيحاولوا دايمًا في اليوم ده إنهم يظهروا الحب ده في أشكال كتير، سواء بالهدايا أو الكلام أو إنهم يعبروا قدام الناس زيّ بوست مثلًا على السوشيال ميديا.
شيء جميل إننا نعرف نعبر ونوصل اللي احنا حاسينه، بس لو بصينا للموضوع من وجهة نظر تانية، أكيد هنلاقي ناس فقدوا أمهاتهم، ويوم زيّ ده ممكن مايبقاش ذكرى سعيدة لهم على عكس العادي أو الطبيعي. ممكن اليوم ده يعدي عليهم بحزن واكتئاب، خصوصًا لو علاقتهم بأمهم كانت قوية فالموضوع بيبقى أسوأ، أو بالنسبة للأطفال أو الأشخاص اللي فقدوا والدتهم من فترة قصيرة، ساعات ممكن نضغط عليهم من غير ما نقصد أو من غير ما ناخد بالنا.
وخصوصًا في المدارس لما بيتعمل حفلات عيد الأم، وبيطلبوا إن أمهات الأطفال يحضروا الحفلة علشان يتكرموا، أكيد الموضوع ده له إيجابيات في إننا نخلق عند الأطفال ذكرى حلوة ونساعدهم إنهم يحتفلوا بأمهاتهم، بس بجانب ده نقدر نشارك الأطفال اللي فقدوا أمهاتهم ونحاول إننا نربطهم باليوم بإنهم يشاركوا في نفس الأنشطة ونقولهم ونفكرهم إنهم لسه محبوبين، رغم إن حب الأم مايتعوضش ولكن ده مايمنعش إنهم لسه لهم مكانة عند الناس.
هدية لكل أم فقدناها
عارفين إن اليوم ممكن يعدي عليك بحزن واكتئاب، بس بنقولك “أنت مش لوحدك!” وعلى قد ما تقدر حاول إنك ماتركزش في مشاعر سلبية، حاول إنك تبص لليوم ده من وجهة نظر تانية غير “الفقد” أو “الخسارة”.
زور دار مسنين، الناس دي بتبقى محتاجة حد يسأل عليها طول السنة وبتستنى اليوم بالذات، إيه المانع لو تقضي معاهم اليوم ده وتخرج بعدها بطاقة حب وحنان، وتدي لهم أنت كمان نفس الطاقة.
افتكر لوالدتك الحاجات الحلوة واعمل لها خير دايمًا، واتبرع باسمها في أي مؤسسة خيرية، أو ادفع تمن أوضة في مستشفى صدقة جارية لها، ادعي لها وخلي كل الناس اللي بيحبوها يدعوا لها، هي محتاجة لكده أكتر من أي وقت تاني. الحاجات اللي كانت دايمًا بتقولك عليها إنك تعملها أو تبطلها، آن الأوان إنك تنفذها! أهلها أو الناس اللي بتحبهم واللي كانت متعودة تسأل عليهم وتزورهم زورهم أنت واسأل عليهم.
كل ده هيساعدك أنت نفسيًا على مستوى كبير وهيخرج منك طاقة حزن وهيحسسك إنها معاك في كل خطوة أنت بتعملها وهتحس بوجودها معاك لما تعمل الحاجات اللي كانت هي بتحبها وكان نفسها تتعمل وهي عايشة. وبجانب كل ده، فاللي أنت هتعمله هيبقى أحلى هدية تقدمها لوالدتك يوم عيد الأم.