دور الأم في السينما والدراما المصرية دور مهم جدًا، وفي نجمات كتير لعبوا الدور ده، لكن في 7 نجمات بالذات واسمائهم وأدائائهم الفنية ارتبطت بقوة بدور الأم، لإنهم أجادوا الدور ده، ولعبوه بكل إتقان وحب لحد ما أقنعونا إنهم أمهاتنا كلنا كمصريين، وعلشان كده قررنا نعمل قائمة بأهم النجمات اللي عملوا دور الأم المصرية في السينما والدراما، يلا بينا!
فردوس محمد: الأم الطيبة
اتولدت فردوس عبدالحميد في سنة 1906، وماتت في 1961، والدها ووالدتها اتوفوا وهي طفلة، وربوها ناس قرايبها من ناحية والدتها، ودخلوها مدرسة إنجليزية في حي الحلمية، اتعلمت فيها القراءة والكتابة والتدبير المنزلي.
اتجوزت صغيرة في السن واتطلقت صغيرة، وانضمت لفرقة عبدالعزيز خليل وبقت ممثلة، واتجوزت مرة تانية من الممثل محمد إدريس، وعاشت معاه 15 سنة لحد ما توفي، وربنا ما أكرمهاش بالأولاد، وماعرفتش الأمومة في حياتها رغم إنها كانت واحدة من أهم الأمهات في السينما المصرية اللي حطتها دايمًا في دور الأم القوية.
عملت دور أم شادية في فيلم “شباب امرأة” ، وأم عبدالحليم في فيلم “حكاية حب”، وأم شكري سرحان في فيلم “رد قلبي”، وأم فاتن حمامة في فيلم “سيدة القصر”، وكانت أم عنتر “فريد شوقي” في فيلم “عنتر وعبلة”، وأم عمر الشريف في فيلم “إحنا التلامذة”.
زوزو نبيل: الأم المنحرفة
بدأت مشوارها الفني في فرقة مختار عثمان كممثلة، وبعدها انتقلت لفرقة يوسف وهبي، وكان أول فيلم تمثل فيه هو فيلم “الدكتور” سنة 1937، ومن أول المرات اللي ظهرت فيها على الشاشة كانت في فيلم “سلامة” مع أم كلثوم، ولعبت دور صديقة أم كلثوم.
نجحت زوزو نبيل في تقديم الأدوار المركبة والصعبة، وأجادت أداء دور الأم ذات المنظومة الأخلاقية الفاسدة، والزوجة الشريرة، والست العجوزة المتصابية، و قدرتها على أداء الأدوار المركبة والصعبة خلى مخرجين جيلها يحطوها دايمًا في أول اختياراتهم، والمخرج حسن الإمام اشتغل معاها في 12 فيلم من أفلامه.
عملت دور أم شكري سرحان في فيلم “وكر الملذات”، وأم نبيلة عبيد في فيلم “المرأة والساطور”، وأم شادية في فيلم” أمال”، وكان دور الأم من أهم وأكتر أدوار زوزو نبيل، ولعبته في أفلام كتير زي فيلم “لواحظ”، وفيلم “أم أوسة”، وفيلم” زمن العجايب”، وفيلم “اللعب بالنار”.
ومع الفن اشتغلت زوزو نبيل في مناصب مهمة؛ في الخمسينات اشتغلت في رقابة المصنفات الفنية في مصلحة الفنون، ومسكت إدارة المسرح الشعبي في وزارة الثقافة سنة 1959، وبعدها اشتغلت في مؤسسة المسرح، وكانت استاذة التمثيل والإلقاء في معهد السينما، ومسكت مناصب كبيرة في الثقافة الجماهيرية لدرجة إنها وصلت لدرجة وكيل وزارة.
أمينة رزق: الأم المصرية المسكينة
في حوار نادر مع أمينة رزق حكت إنها فى سن 6 سنين راحت السينما مع خالها في طنطا لأول مرة، وفرحت جدًا بالتجربة، بس لما والدها عرف ضربها بالكرباج وهو بيقول: “معنديش بنات يروحوا سيما ويشوفوا المسخرة وقلة الأدب”، وعمل مشكلة كبيرة لدرجة إنه كان هيطلق والدتها.
في سن 9 سنين اشتغلت لأول مرة مع يوسف وهبي في مسرحية راسبوتين، وعملت دور طفل أعرج، ولما شافها يوسف بك وهبي بتمثل قالها إنها هتبقى أحسن ممثلة دراما في السينما المصرية، واتحققت النبوئة فعلًا.
كانت أمينة رزق متميزة جدًا فى أداء دور الأم اللى اتشهرت به في السينما المصرية، ونقلت الفنانة الكبيرة دور الأم ببراعة، رغم إنها ماتجوزتش وماخلفتش، لكن كانت رمز مهم من رموز الأمومة على الشاشة.
لعبت دور الأم مع أجيال مختلفة من الفنانين، كانت أم نعيمة عاكف فى فيلم “4 بنات وضابط”، ولعبت دور الأم الارستقراطية، وعائشة أم أحمد عاصم “صالح سليم” في فيلم “الشموع السوداء”، وسامية هانم أم ماجدة في فيلم “أين عمري”، وعملت دور أم فاتن حمامة الفلاحة فى فيلم “دعاء الكروان”، والأم الصابرة فى فيلم “بداية ونهاية، والتوت والنبوت”، وبركة أم عادل إمام في فيلم “المولد”، وأصيلة أم الأولاد في فيلم “العار”، وتفيدة أم فاطمة في فيلم “الانس والجن”، وحليمة السعدية في فيلم “الشيماء”، وبهية أم محمود عبد العزيز في مسلسل “البشاير “وعلوية هانم في مسرحية “إنها حقًا عائلة محترمة”.
وفي حوار مع الفنان سمير صبري قال: “سألتنى واحنا فى العربية، رايحين نصور فيلم “دموع صاحبة الجلالة” اللى عملت فيه دور والدتى: “هو جوزى اللى هو أبوك فى الفيلم مفروض توفي من كام سنة يا سمير؟ فسألتها بتسألى ليه يا ماما أمينة؟ فردت إن عدد السنين يفرق معها فى لفة الإيشارب، فلو كان مات جديد الإيشارب يقرب أكتر من الحاجب، ويبعد لورا كل ما تعدي السنين”. وللدرجة دي كانت الفنانة الكبيرة بتهتم بتفاصيل الشخصية، وبتقدر فنها وبتحترمه، وحريصة على أداء دور الأم بدقة واهتمام.
هدى سلطان: الأم المصرية القوية
اتولدت سنة 1925 في قرية في مدينة طنطا، وهي أخت الممثل والمطرب والملحن المصري العظيم محمد فوزي. كانت والدها المحافظ رافض تمامًا لفكرة الفن، ولما اتمرد عليه ابنه محمد فوزي، اتبرى منه ورفض يعترف به لحد ما حقق نجاح فني كبير، وقدر يقنع والده إنه يسمح لهدى بالتمثيل.
اتجوزت أكتر من مرة، منهم مرة من فؤاد الأطرش، أخو الفنانين فريد الأطرش وأسمهان الأطرش، واتجوزت الفنان فريد شوقي وعملت معاه أكتر من 25 فيلم.
وهي ممثلة وشخصية فذة في العموم، وعملت دور الأم بتنوع مبهر، وأسلوب مميز وسلس على مستوى السينما والدراما. جذبت انتباه عشاق السينما والدراما بأدوار الأم في أفلام ومسلسلات كتير، وانتقلت ما بين شخصية الأم الشديدة أحياناً والأم الهادية والطيبة في أعمال تانية، والأم الصعيدية اللي بتحافظ على التقاليد وعلى العيلة.
عملت دور فاطمة تعلبة في مسلسل “الوتد”، وقدمت شخصية الأم الصعيدية القوية اللي مايشغلهاش غير أولادها وأسرتها وممتلكاتهم والروابط الأسرية اللي ما بينهم.
وعملت دور أم حسن في مسلسل “أرابيسك”، وقدمت شخصية الأم اللي بتدعم ابنها حسن ارابيسك دايمًا، وشيفاه صح، ودايمًا متمسكة بالعادات والتقاليد اللي بتعبر عن ثقافة الشعب المصري.
كريمة مختار: ماما نونة
اسمها الحقيقي عطيات محمد البدرى، اتولدت في اسيوط سنة 1934، وتوفيت في 2017، وحصلت على البكالوريوس، من المعهد العالى للفنون المسرحية، وبدأت حياتها الفنية سنة 1955، فى المسلسل الإذاعى “العسل المر”، واشتغلت فى برامج الأطفال مع “بابا شارو”، وبعد سنين من شغلها فى الإذاعة، رفضت أسرتها الصعيدية إنها تشتغل فى السينما.
لكنها اتحدت كل الظروف واصرت تعمل الحاجة اللي بتحبها، ودخلت مجال التمثيل فعلًا وقدمت لنا مجموعة من أجمل أدوارها السينمائية والتلفزيونية.
ماما نونة، هي أشهر أم في تاريخ الدراما والسينما المصرية، وأم يحيي الفخراني في مسلسل “حمادة عزو”، والأم المغلوبة على أمرها في العيال كبرت، وأم عادل امام “زيزو” في فيلم رجل فقد عقله، وأم ممدوح عبدالعليم في فيلم الجنة العذراء، وأم الفنان الجميل أحمد زكي في فيلم الليلة الموعودة.
دلال عبدالعزيز: الأم الجميلة
اتولدت دلال عبد العزيز محمد في قرية فرغان في ديرب نجم في محافظة الشرقية، وخدت بكالوريوس من كلية الزراعة جامعة الزقازيق، وبكالوريوس من كلية الإعلام جامعة القاهرة، وليسانس الآداب قسم اللغة الإنجليزية من كلية الآداب جامعة القاهرة، ودبلوم في العلوم السياسية من كلية الاقتصاد والعلوم السياسية جامعة القاهرة.
وفي سنة 1984 اتجوزت الفنان سمير غانم، وخلفت بناتها دنيا وأمل (المعروفة باسم إيمي) والأربعة بقوا أشهر أسرة فنانين على الشاشة العربية النهارده.
عرفناها في دور الأم الجميلة في أعمال سينمائية وتلفزيوينة كتير، زيّ مسلسل “سابع جار”، “وابن الأرندلي”، “ولهفة”، و”بدل الحدوتة تلاتة”، و”في بيتنا روبوت”. وفي أفلام كتير زيّ؛ “كارما”، “وقلب أمه”، “وسوق الجمعة”، و”صنع في مصر”، و”القشاش”.
سوسن بدر: الأم السهونة الشيك
هي نفرتيتي السينما المصرية، صاحبة الملامح المصرية الفرعونية، درست في معهد الفنون المسرحية، واختارها المخرج شادي عبد السلام علشان تعمل دور نفرتيتي في فيلمه “أخناتون”، لكن للأسف المشروع ماكملش بعد ما المخرج مات قبل ما يتم الفيلم.
شاركت في فيلم مثير للجدل سنة 1980 اسمه “موت أميرة” وبيحكي قصة الأميرة السعوية مشاعل بنت فهد آل سعود، اللي اتهموها بالزنا وقتلوها، فاتمنعت من دخول السعودية، والتلفزيون المصري اعتبرها من الممنوعين، واتحاربت جدًا بعدها من مجال الفن لحد ما غيرت اسمها من “سوزان بدر الدين” لـ “سوسن بدر”.
عملت دور الأم في مسلسلات بنحبها كلنا، زيّ؛ مسلسل “عايزة أتجوز”، وكانت والدة الفنانة هند صبري، ورجعت مرة تانية في نفس الدور في مسلسل “البحث عن عُلا”، وعملت دور الأم في مسلسل “أبو العروسة”، ومسلسل “يونس ولد فضة” ومسلسل “أفراح القبة”.
لو عايز تضيف نجمات مصريات تانيين لقائمة أشهر الأمهات في السينما المصرية، سيب لنا الأسم في كومنت، وقول لنا ليه شايف إن النجمة دي هي واحدة من أهم الأمهات.