21 أبريل ذكرى وفاة سيد مكاوي شيخ الملحنين، الموسيقار والملحن والمطرب اللي شارك في بناء التراث الفني والثقافي المصري، اللي مرتبط معانا بذكريات كتير، وكان بيتمتع بذاكرة موسيقية قوية، أول ما يسمع الموشح مرة واحدة بيحفظه عن ظهر قلب.
صاحب النظارة السوداء، كان ضيف عزيز علينا في رمضان وفي فقرة السحور بأغنية (المسحراتي) كان ماشي بطبلته وجلبيته يصحي الناس “مسحراتي في البلد جوال.. اصحى يا نايم وحد الدايم.. رمضان كريم” غناها من غير فرقة موسيقية، وهو اللي طلب إنه يغنيها مش بس يلحنها، طفولتنا كلها كانت بين إيديه كان الرابط الأول لرمضان بالنسبة للأطفال.
ده غير إنه كان مرتبط بأيام الإذاعة بمواعيد يومية ثابتة، بيغني فيها الموشحات والأغاني اللي معمولة بالموسيقى الشرقية، واللي الناس ماتعرفوش، إنه كان له الفضل الأول في فكرة وضع مقدمات (تترات) غنائية للمسلسلات الإذاعية والتليفيزونية، ومن بعدها قدم أشهر التترات لمسلسلات زي (شنطة حمزة رضا) يعني عمل معانا ذكريات وساهم في صنع ذكريات تانية.
شهرته اتصاعدت بعد ما لحن أغنية (مبروك عليك يا معجباني يا غالي) لشريفة فاضل، واللي كانت ماركة مسجلة في كل الأفراح والمسلسلات، واللي كتبها صلاح جاهين اللي كان صديق دربه ونجاحه.
ولحن لكبار الفنانين؛ زي ليلى مراد في (حكايتنا احنا الاتنين)، ونجاة الصغيرة (لو بتعزني)، وشادية (هوى يا هوي ياللي أنت طاير)، وصباح (أنا هنا يا ابن الحلال)، وأغنية (يا مسهرني) لكوكب الشرق أم كلثوم، ووردة الجزائرية في (أوقاتي بتحلو)، وعمل (الليلة الكبيرة) من أشهر أوبريتات التراث الفني وغناها عدد كبير من نجوم الغناء، وغيرها وغيرها من الأغاني، وكل أغنية كانت ناجحة بطريقة وشكل لوحدها، وكانت مرتبطة بذكرى معانا.