يوافق اليوم ذكرى ميلاد أسطورة من أساطير الكوميديا العربية، النجم نجاح الموجي، وبدأ حياته السينمائية مع ثلاثي أضواء المسرح، بعد ما أسند له المخرج محمد سالم أول دور في حياته في مسرحية “فندق الأشغال الشاقة” سنة 1969، مع الفنان جورج سيدهم، ليبدأ مسيرة كبيرة من الأعمال المهمة الخالدة زي” ليه يا بنفسج” و”سكة الندامة” والبحر بيضحك ليه” مع الفنان محمود عبد العزيز.
كانت التلقائية والخروج عن النص أكتر أشياء بتميز نجاح الموجي عن غيره من الفنانين، وقدمت لنا عدد كبير من الأغاني والإيفيهات اللي مازالت موجودة لحد النهارده، وبنستخدمها في يومنا بشكل كبير، سواء في الحياة اليومية أو على السوشيال ميديا.
صح بس هنكر
يعتبر من أشهر إيفيهات نجاح الموجي، وبيتداولها الشعب المصري على مر السنين، سواء في الحياة العامة أو على السوشيال ميديا، الإيفيه ظهر ضمن أحداث فيلم الكيت كات لما جسد الفنان نجاح الموجي شخصية “الهرم” تاجر المخدرات، وفي أحد المشاهد بيحكي عن موقف جمعه بلواء شرطة، وسأله : “إنت ياض بتتاجر في المخدرات، صح ولا هتنكر”، ورد: “صح بس هنكر”.
من لم يمت بالسيف مات بالمطواة
الايفيه كان على لسان شخصية “عباس النص” ضمن أحداث فيلم “المساطيل”، وفي أحد المشاهد قال عباس قدام ظابط الشرطة: “من لم يمت بالسيف مات بالمطواة”.
“أنا الشعب”
أنا الشعب من أكتر الايفيهات اللي عايشة معانا لحد دلوقتي، ظهر الإيفيه ضمن أحداث مسرحية “المتزوجون” وكان نجاح الموجي بيجسد شخصية “مزيكا” صبي الجزار، وسأل جورج سيدهم (شخصية حنفي) مزيكا وقاله: “قولي يا واد يا مزيكا، إنت بتفهم في السياسة”، ليرد عليه: “أنا الشعب”.
“ألغام” ومشكلته مع الفنانة أنغام
إيفيه “ألغام” من أكتر الأيفيهات اللي سببت لنجاح الموجي مشاكل كتير في الوسط الفني، بسبب استهزائه من الفنانة أنغام في مسرحية “لا مؤاخذة يا منعم”، ومن بعدها قررت أنغام رفع قضية على الفنان نجاح الموجي واتهمته بالسب والقذف، وأدت لوقوفه أمام جهات التحقيق.
احنا مابنروحش للحرام.. الحرام هو اللي بيجي لحد عندنا
قال الموجي الإيفيه في مسرحية “صاحب الإدارة بواب العمارة” أمام الفنان الراحل عادل أدهم، وقاله: “أنا مابروحش للحرام”، ليرد عليه الموجي: “حرام إيه يا جدع.. إحنا مبنروحش للحرام.. الحرام هو اللي بيجي لحد عندنا”.
