وصل للعالمية بأدبه وبكتاباته، ساب لنا كنوز وأعمال لسه عايشة معانا وبنفتكرها، نجيب محفوظ أول أديب مصري أخد جائزة نوبل بسبب أعماله الصادقة واللي عبرت في كل سطر فيها عن حال المجتمع المصري. وعن الطبقات المهمشة فيه، وفي ذكرى حصوله على نوبل حبينا نفتكر مسلسلات تم اقتباسها من رواياته.
حديث الصباح والمساء
رواية من أعظم ما كتب نجيب محفوظ، أخدها السيناريست محسن زايد وحولها لمسلسل بقى نوستالجيا الدراما المصرية، مسلسل من إنتاج 2001 وإخراج أحمد صقر وبطولة مجموعة كبيرة من النجوم منهم: ليلى علوي وأحمد الفيشاوي ونيللي كريم وأحمد رزق وسوسن بدر وريهام عبد الغفور وعبلة كامل ودلال عبد العزيز.
بتشوف من خلال المسلسل تاريخ مصر الاجتماعي والسياسي في فترة ما قبل ثورة 1919، من خلال 3 شخصيات وبتعيش مع قصصهم وعيلتهم اللي بتكبر بمرور الزمن، هتعيش حكايات وقصص لطبقات وأجيال مختلفة من نسل الشخصيات دول.
بين السماء والأرض
مسلسل شوفناه في رمضان السنة اللي فاتت، وحقق نجاحه كبير بسبب صدقه في طرح المشاكل، كان معمول قبل كده فيلم بس مع اختلاف قصص الناس اللي كانت محبوسة في الأسانسير، المسلسل كان بطولة عدد كبير من النجوم كل واحد منهم ساب علامة بأدائه.
أفراح القبة
اتعرض في 2016 وقام بالبطولة منى زكي وإياد نصار وجمال سليمان وصبا مبارك ومن إخراج محمد ياسين، وأحداثه بتدور داخل واحد من الفرق المسرحية بيعملوا مسرحية تحت نفس الاسم، وبعدين بيكتشفوا إن المسرحية بتدور حولين شخصياتهم الحقيقية مش شخصيات الرواية، ومؤلف المسرحية لعب عليهم اللعبة دي، علشان يفضح حقيقتهم قدام نفسهم، ويفكرهم بغلطاتهم زمان.
الحرافيش
قدمها النجم الراحل نور الشريف وشارك في البطولة إلهام شاهين، المسلسل بيتكلم عن البطل الشعبي رجل الحارة المصرية القديمة، واللي كان بيتميز نجيب محفوظ دايمًا إنه يعبر عنه وعن الحارة بشكل عام.