النهارة -الخامس من شهر سبتمبر- بيوافق اليوم العالمي لعمل الخير اللي اختارته الأمم المتحدة لأنه بيوافق يوم وفاة الأم تيريزا اللي حصلت علي جائزة نوبل للسلام لجهودها الإنسانية في مساعدة المحتاجين والقضاء على الفقر. وزي ما عمل الخير مرتبط في أذهانا بأعمال محددة زي التبرع للمؤسسات الخيرية بالمبالغ المالية أو بالمنتجات العينية والملابس، إنتوا ممكن تسيبوا بصمة بأعمال صغيرة جداً وتعملوا فرق كبير في حياة الناس.
ولو إنتوا حابين تشاركوا بأي حاجه في اليوم ده وتبقى بعد كده جزء من روتين حياتكم، أحنا جبنالكم مجموعة من الأفكار المختلفة والبسيطة اللي ممكن تساعدكم.
ابتسموا في وجه الأخرين
أيوه الموضوع بجد بالبساطة دي. ابتسامك في وش أهلك أو حتي الناس البسيطة اللي متعرفهمش لما عينك تيجي في عينهم حاجة ليها أثر نفسي جميل أكتر مما تتخيل. الابتسامه دي بتحسس اللي قدامك أنه متشاف ومتقدر، وساعات بتبقي أكتر حاجة الواحد محتاج يحس بيها في يومه خصوصًا في الأوقات الصعبة.
زوروا دار أيتام وألعبوا مع الأطفال
إنك تتبرع بفلوس للأطفال ده شيء جميل، ولكن الأجمل إنك تروح دار للأيتام علشان تتبرع للأطفال بوقتك وحنيتك عليهم، اللي صدقني بتفرق معاهم أكتر من الفلوس، لأن كل اللي بيحتاجه الأطفال هو حد يوريهم شوية أهتمام وحب (ولعب كتير أكيد).
خدوا أطفال بسيطة وخلوهم يشتروا حاجة نفسهم فيها
الأطفال دول ممكن يكونوا أولاد حارس العمارة بتاعتك أو ناس بسيطة أهلك يعرفوهم من زمان. خدهم من إيديهم ووديهم لمحل لعب أو حتي كشك صغير ينقوا هما الحاجه اللي نفسهم فيها بمزاجهم، دي حاجه هتفرق جداً معاهم، وهتفرحهم بالهدية أكتر 10 مرات حتي لو كانت مجرد شيوكلاتة.
تطوعوا في عمل خيري
في منظمات خيرية كتير في مصر والوطن العربي تقدروا تطوعوا من خلالها علشان تساهموا في حل مشاكل الفقر، وبالتالي هتقدروا تشاركوا بمجهودكم ووقتكم في المجال اللي يناسبكم زي إنكم تساعدوا في تعبئة شنط الأكل والملابس اللي بتوزعها المؤسسات الغير ربحية علي المحتاجين .