الرضا الوظيفي من أهم عوامل نجاح أي شركة أو مؤسسة، لو الموظف اللي بيشتغل حاسس إنه بيشتغل في بيئة عمل سامة وحاسس إنه مجرد آلة مطلوب منها إنها تطلع شغل، مش هيدي من طاقته ومجهوده وشغفه للشغل، وده هيعود بالسلب على الشغل. وفي اليوم العالمي لتقدير الموظف، جبنالك مجموعة من النصائح البسيطة تقدر تعتبرها دليلك أو كتالوج لك علشان تتعامل مع الموظفين في الشركة ويحسوا بتقديرك لهم.
قراءة المزيد
- شكرًا! كلمة سهلة وبسيطة بس معناها كبير وتأثيرها أكبر، حتى لو ناس كتير مابتعرفش تقولها وبتحسها تقيلة عليها.
- بونص من غير ما يطلب! لو أنت شايف إنه بيعمل شغله على أكمل وجه، ومش مقصر وبيدي طاقته كلها للشغل، إيه المانع إنك تحسسه بالتقدير ده في شكل مادي؟
- يوم الشغل بيبقى أحيانًا طويل وممل ومتعب، إيه المانع لو يبقى فيه أي وسيلة ترفيه في المكان؟ بلايستيشن مثلًا أو أي لعبة جماعية؟ مش بس هتخرج الطاقة السلبية، لأ دي هتقوي الروابط والعلاقات بين الموظفين، وده هيعود كمان على الشغل بالنفع!
- قدم لهم ملاحظات إيجابية: لو في ملاحظات على الشغل سواء حلوة أو وحشة، حاول إنك وأنت بتقول الملاحظات السلبية تجيب سيرة الإيجابية برضه، وخلي المناقشات تبقى رمادي مش أسود بس ولا أبيض بس.
- حاول تستثمر في الموظفين: أكيد الموظف هيحس بالتقدير لو لقى إن المكان اللي موجود فيه عايز يطور منه، لمصلحته ومصلحة المكان كمان. وده في الأخر هيعود على الموظف بالنفع حتى لو ساب المكان، وهيفتكر إن المؤسسة دي ماكانتش مجرد بتوظف الناس، لأ دي كانت بتستثمر فيهم كمان.