أوقات بنكون زهقنا من الطرق التقليدية للأكل، وبالذات الأكل اللي بيتعمل على السحور علشان مافيهوش افتكاسات كتير، وخصوصًا في طرق عمل الفول، مانعرفش غير كام طريقة شائعين عندنا هما: الفول بالليمون، الفول بالبيض، الفول بالطحينة، بالزيت الحار أو الطماطم.
وبعدين وقفت افتكاسات الأمهات على كده، ولإننا زهقنا من الروتين بتاع الأكل، جبنالكم كام طريقة مختلفة لعمل الفول تقدر تجدد بيهم على سفرة السحور بتاعتك.
فول بالسجق البلدي
هنجيب سجق بلدي – فول مدمس- بصلة مفرومة ناعمة- طماطم- فلفل رومي مكعبات- توم- فلفل أحمر حار- ملح وفلفل وبهارات.
طريقة التحضير
هنجيب طاسة سخنة على النار ونحط عليها زيت والبصل والتوم والفلفل ونخليهم يتشوحوا لحد ما تشم ريحة التوم، وبعدين يتحط عليهم السجق والتوابل والطماطم المكعبات ويتساب لحد ما يستوي على النار، ونضيف بعدها الفول ويتقلب كويس علشان الطعم يتشرب، وممكن في الأخر تحط رشة زيت في الأخر مع رشة توم من فوق ويتقدم وهو سخن وبالهنا والشفا.
فول بالجبنة الكيري
المقادير: علبة فول مقشر- طماطم مكعبات منزوع القشر- مربعات جبنة كيري- توم- معلقة صغيرة زنجبيل- بصل مقطع مكعبات- مسحوق كزبرة – معلقة من معجون الطماطم- زيت زيتون- نص ليمونة- ملح- كمون- كزبرة متقطعة.
طريقة التحضير
هنحط التوم والبصل والفلفل على النار ونسيبها لحد ما تبقى طرية، هنضيف بعدها مسحوق الكزبرة والكمون ومعجون الطماطم والفول ونهرسهم على النار ونسيبهم من 5- 10 دقائق، وبعدها هندوب الجبنة الكيري في وعاء تاني مع شوية مياه مغلية علشان يطلع مزيج كيري، هنطفي النار من تحت الفول وبعدها هنحط عليه خليط كيري مع الليمون والكزبرة المتقطعة وزيت الزيتون.
فول مدمس بالخضروات
بالنسبة للمقادير هنجيب فول مدمس- معلقة كبيرة معجون كاري أخضر- بصلة مفرومة- لبن جوز هند- ثمرة كوسة- فلفل رومي وملح.
طريقة التحضير
هنشوح الكاري في زيت على النار، بعدها هنحط البصل المفروم وهنقلب ولبن جوز الهند والملح، وعليهم الفول المدمس والكوسة، أخر حاجة هنقطع عليهم الفلفل الأحمر الرومي.
فول بالبسطرمة والبشاميل
المقادير: فول مدمس- بسطرمة- زبدة- زيت- كمون- طماطم- بشاميل خفيف- بقدونس مفروم- كزبرة مفرومة- بصل أخضر- توم- جبن مشكلة مبشورة- ملح وفلفل- عصير ليمون.
طريقة التحضير
هنشوح البسطرمة في زبدة على النار مع فص توم مفروم وفلفل وبصل ورشة فلفل، وبعدها هنشوح برضه الفول بعد ما نصفيه في زبدة على النار مع التوم وعصير الليمون، وهنحط الكزبرة والبقدونس ومكعبات الطماطم مع التقليب، هنطلع البشاميل مع مكعب زبدة على النار مع شوية مياه فول وعصير الليمون، وفي قاع الطاجن هنضيف شوية بشاميل وبعدين الفول وبعدها خليط البسطرمة ونحط على الوش طبقة من البشاميل والجبن، وندخلهم الفرن لحد ما وشهم يتحمر. ويتقدموا مع رشة كزبرة ومكعبات طماطم على الوش.
فول بالزبادي والطحينة
مقادير فتة الفول: علبة فول مدمس- كمون- صلصة طماطم-توم- طماطم مفرومة ناعم- بصل مفروم- زيت زيتون- ملح وفلفل.
مقادير صلصة الفتة: كوب الزبادي- معلقة كبيرة طحينة- معلقة كبيرة خل- نص كوباية من عصير الليمون- عيش عربي مقلي ومتقطع صغير- بابريكا وبقدونس للتزيين.
طريقة التحضير
نجيب طاسة عليها زيت ونسخنها ونحمر البصل والطماطم والتوم والصلصة لحد ما يدبلوا ونضيف عليهم الفول بعد ما تتسبك الصلصة ونضيف الملح والكمون، وعلشان نجهز صلصة الفتة هنجيب طبق كبير نخلط فيه الزبادي مع الطحينة والخل وعصير الليمون ونتبله بالملح والفلفل.
وفي طبق التقديم نضيف طبقة من الخبز المقلي وبعدها الفول وأخيرًا صلصة الطحينة والزبادي، ونزينها بالبابريكا والبقدونس وبالهنا والشفا.