دايمًا بندور على فطار حلو نبدأ بيه يومنا، خصوصًا واحنا في الشغل، دايمًا فكرة إننا نتفق على فطار يكون حلو وسعره مناسب بتكون فكرة أشبه بمهمة مستحيلة، وبندور على فطار مكوناته مصرية تقليدية مانقدرش نستغنى عنها على الفطار زي الفول والطعمية، بس معمولين وبيتقدموا بطريقة غير تقليدية، وهنا ابتدت “فول تانك” تقدم أفكار جديدة وحبوا يبتكروا في أطباق الفطار في العناصر الأساسية وهي الفول والطعمية والبطاطس، لكن بطريقة جديدة وأطباق من براءة اختراعهم.
ولإن الفول بالنسبة للمصريين طبق مقدس، بنحب نبدأ بيه يومنا ونحب نخترع ونفنن في تقديمه، من هنا جت أحدث اختراعات “فول تانك”.
أحدث اختراعات الفول والطعمية
“فول تانك” حصل على براءة اختراع فول بالباربكيو، ده غير الطعمية بالموتزاريلا وفتة البطاطس، وطاجن الفول بالبشاميل وأطلقوا عليه “فول عمتي”.. كل دي أطباق بيقدمها “فول تانك” بجانب الأطباق والساندوتشات التقليدية للفول والطعمية، وكمان بيقدموا منيو فيه بوكسات لو حبيت تختار من كل بلد أكلة زي ما بيقولوا، أو لو حبيت تشاركها مع زمايلك وأصحابك في الشغل. ومنها بوكس صحي (للدايت) لو حبيت تاكل فول وطعمية وفي نفس الوقت تحافظ على الفورمة.
“فول تانك” فروعهم موجودة في الدقي والرحاب وقريب هيكونوا في أماكن أكتر.
أسرة “فول تانك”
علشان تطلع أكل حلو وتخترع وتفنن فيه، لازم يكون وراء كل ده فريق عمل نفَسه حلو زي ما بنقول، وفعلًا “فول تانك” فيه فريق موظفين كل شخص منهم له قصة مع الأطباق المميزة عندهم، ومرتبط بالمكان بشكل ما. اتعرف على فريق “فول تانك”:
هدى حسني
رحلة الـ CEO في “فول تانك” بدأت بعد ما طلب منها أخوها وأصحابه إنها تساعدهم في مشروعهم، ومن هنا بدأت مشوارها وقالت لنا: “في 2012 طلب مني أخويا وأصحابه (مؤسسين فول تانك) إني أساعدهم في الإدارة، وبالفعل بدأت التدخل فى أمور الشركة والإشراف على جميع الأقسام، ومن اللحظة دي بقيت انا كمان شريكة في المكان وبقيت حاليًا المدير التنفيذى للشركة”.
وكملت: “أكتر حاجة بحبها فى فول تانك هى تعامل فريق العمل مع بعضهم كأفراد أسرة واحدة، وإنهم بيسعوا للوصول للأفضل بأقل الإمكانيات.
وعن طبقها المفضل قالت: “أكتر حاجة بحبها جدًا فى المنيو هى الطعمية المحشية سبايسي، لكن طول الوقت بطلب بوكس الدايت.
سألناها عن أغرب أطباق اخترعوها، وأكتر أكلة شايفا إنها ميكس غريب، وقالت: “أغرب وصفة اتعملت فى فول تانك (فول باربكيو) فعلًا من أغرب الأصناف وعمرى مافهمته بس طعمه حلو جدًا ومن أقوى المبيعات للشركة”.
“من اللحظات المهمة وتعتبر أحلى ذكرياتي في فول تانك كانت في يوم كنت في إحدى المناسبات وسمعت أشخاص بيتكلموا مع بعض عن إن فى مكان جديد حلو أوى وسمعتهم بيقولوا اسم المطعم فول تانك.. فرحت جدًا وحسيت إني فخورة بالمكان وفريق العمل”.
محمد عبد الغني
قصته بدأت مع “فول تانك” من 2012، حكى لنا: “ابتديت العمل فى فول تانك في تغليف وتجهيز الطلبات (Dispatcher) من 2012 واستمريت فى العمل لحد ما بقيت مدير تشغيل فول تانك. أكتر وصفة شايف إنها غريبة هي فول بالبشاميل (فول عمتي)، وأكتر حاجة أنا بحبها في المنيو هي فول سلطة وطحينة وجبنة فيتا حارة”.
وعن أسرة “فول تانك” قال: “أكتر حاجة بحبها فى فول تانك هو فريق العمل المتعاون وإحساسهم بالمسؤولية تجاه المكان، وليا معاهم ذكرى عمري ما أنساها، لما احتفلوا بيا إني تميت 10 سنين في المكان”.
أمينة عبد العال
بدأت مع فول تانك في وظيقة كول سنتر في 2016، وأثبتت نجاحها ووصلت حاليًا لمنصب المدير التنفيذي والمشرف العام لجميع الاختصاصات بالشركة، سألناها عن أطباقها المفضلة وعن أغرب اختراع بالنسبة لها، وقالت: “أكتر حاجة بحبها في المنيو فتة البطاطس، لكن أغرب حاجة عملناها هي الطعمية بالموتزاريلا”.
وعن علاقتها بالفريق قالت: “أكتر حاجة بحبها فى فول تانك هى نشاط فريق العمل وتحدى الصعوبات والإحساس بالانتماء الدائم للمكان، ومش هنسى لحظة احتفالهم بعيد ميلادي”.
الشيف رامي سعيد
ختمنا جولتنا في فول تانك بلقاء مع الشيف نفسه، شيف رامي سعيد بدأ كشيف مسؤول عن فرع واحد في 2018، ودلوقتي هو الشيف العام للمكان.
وعن الأطباق المفضلة قال: “أكتر حاجات بحبها فى منيو فول تانك هما فول إسكندراني وفتة البطاطس، لكن أغرب وصفة اتعملت في فول تانك بالنسبالي هي صوص فتة البطاطس، مختلف جدًا وطعمه حلو”.
“أكتر حاجة بحبها فى فول تانك إن طول الوقت فى أفكار جديدة ومختلفة، ومن أحلى ذكرياتي مع المكان يوم الفطار الجماعى لفريق العمل فى شهر رمضان”.
قصص ملهمة وراء مشروع مصري بأفكار وابتكارات جديدة تستحق التجربة، لو بتحب تنوع في وجبة الفطار أكيد “فول تانك” هيكون اختيار مميز في يومك.