عيد الأم آخر الشهر.. أفكار لهدايا معنوية تقدمها لوالدتك

مشكلة عيد الأم إنه بيجي في آخر الشهر، ومعظمنا مرتبه على “وشك النفاذ”، وحاليًا هيبقوا على نظام “ماما أنا هديتك”، وطبعًا معروف إيه رد فعل مامتك على الكلام ده، بس في حاجات معنوية قيمتها هتكون كبيرة عند الأمهات خصوصًا في مصر، وهيفرحوا بيها جدًا زي:

اطبخلها

لو بتعرف تطبخ حاول تمسك زمام الأمور وخليها ترتاح ولو يوم من شغل البيت خصوصًا في أيام رمضان، و لو قدراتك في المطبخ مش أقوى حاجة عندك شوف فيديوهات طبخ سهلة اتعلم منها حاجة جديدة وحاول تجربها، ولو قدراتك معدومة فأنصحك بلاش لأن الموضوع هيتقلب ضدك وهتلاقيها هي واخواتك بيحسبنوا عليك وقت الفطار، فالأحسن في الحالة دي تساعدها و تشوف هي عايزة إيه وقت تحضير الفطار، ممكن تفاجئها وتعمل حاجة حلوة من الموجودة في البيت و بعدها تحط عليها شمعة و تشغلها أغنية “ست الحبايب يا حبيبة”.

ساعد في شغل البيت

خلصت طبخ الفطار ؟ طب بالمرة نضف/ي لها الشقة وبالذات أوضتك اللي كان حلم حياتها تشوفها نضيفة، هتكون طايرة من الفرحة لما تشوفك ماسك/ة مقشة أو بتغسل طبق ساعتها، صدقني هتحبك أوي، ويا سلام لو استمريت على إنك تعفيها من شغل البيت يوم أو يومين أو اسبوع، هتحكي عن الحدث ده طول حياتها، ممكن كمان تساعدها في تغيير الدولاب بتاعها بإنك تطلعلها الهدوم الشتوي وتنزلها الهدوم الصيفي .

تسمع كلامها ولو مرة

في كام حاجة مامتك طلبتها منك ومعملتهاش، أنت ممكن تبطل سجاير في اليوم ده، ممكن تقص شعرك أو تعمله على جنب معلش ده يوم في السنة هيرجع لشكله تاني، ماترميش الشرابات في أي حتة، تبطل أي حاجة بتستفزها وتاخد قرار بده للأبد.

خرجها برا البيت

عارفين إنك “كحيان يا محمد” بس مانقصدش خروجات غالية خالص، انزل مشيها تحت البيت تغير هي جو، أكيد معاك على الأقل 20 جنيه روح جيب ليها علبة عصير هي هتفرح بالحاجات دي، ممكن توديها وتوصلها لمامتها أو خالتك هتفرح هي جدًا.

تذاكر لأخواتك

هي مهمة صعبة، بس والله ده حمل تقيل جدًا عليها لأنها بتقعد بالساعات تفهمهم وتشرحلهم، بس ده في ميزان حسناتك، وأهم حاجة تشرب لمون بالنعناع وتهدي أعصابك منعاً للإشتباكات..

تعملي دور الكوافير

لو بتعرفي بعض من مهارات الكوافير هتبقى حاجة حلوة ليها وهتفرحها وهتبسطها، ممكن تقصي شعرها أو تعملي لشعرها سشوار أو مكواة، أو مانيكير وباديكير، وتعملي ليها مكياج وتطلعي مهارات الميك أب ارتيست، هتفرح جدًا.

اخر كلمة : ما تفوتوش قراءة : الأم التانية في حياتنا.. لماذا نعتبر جداتنا “شخصية فريدة” في روايتنا؟