في سباق رمضان التليفزيوني الدرامي كل سنة، بنكون متحمسين للأعمال اللي هنشوفها، ومن ضمن الحاجات اللي بنكون متحمسين لها هي الأزياء والفساتين والشنط والجزم والشعر، ولكن السنة دي خادنا بالنا من حاجة جديدة، وهي اكسسوارات الرجالة.
فشوفنا في مسلسل “نسل الأغراب” شخصية “غفران الغريب” اللي ماسك عصاية على راسها “راس أسد”، واللي ممكن نكون مش عارفينه هو إن الشخصية كمان مربية أسد اسمه “السبع” وفي تماثيل أسود كتيرة في بيته، فنقدر نقول إن ده بيمثل شخصيته، واللي بيقوم بتمثيلها الفنان أمير كرارة، وفي مسلسل “اللي مالوش كبير” بنشوف “خديوي” لابس سلسلة محفور عليها صورة أسد كمان، واللي بيقوم بتمثيل الشخصية الفنان أحمد العوضي، والشخصية برضه مربية أسود.
اللي ورا التصاميم دي فنانة اسمها سالي مبارك واللي بتدير عمل باسم “سلطانة سيلفر“. قالت سالي إن عصاية أمير كرارة مصنوعة من الفضة ولكنها مطلية بذهب عيار 24، وده لإن شخصية “غفران الغريب” محبة جدًا للذهب، وكان في مواصفات معينة للعصايا، فكان لازم تناسب طول الفنان أمير كرارة، وبدأت سالي في الرسم والتصميم، وبدأت تنفذ شهرين قبل شهر رمضان.
