كلنا فاكرين رمضان 2020، واللي عملته فيه الكورونا، وإزاي نص المسلسلات اتلغت، والباقي اتأجل تصويره، وفضل يصارع طول الشهر علشان ينجز الحلقات، بس في دراما رمضان 2021، الصناعة قررت تنتقم وراجعين بموسم تقيل في دراما رمضان 2021، مليان مفاجأت وحاجات يمكن أول مرة تحصل في مصر.
نجوم الصف الأول
إحنا متعودين إن كل نجم صف أول بيشيل مسلسل لوحده بيكون هو البطل فيه، بس السنة دي الوضع مختلف، لأول مرة هنشوف مثلًا اسم “أحمد السقا” جمب اسم بطل من الصف الأول، وهنشوف “أحمد مكي” مع نجم شباك وتليفزيون وكمان بيمثل دراما.
الاختيار 2
أعلن المخرج المصري “بيتر ميمي”، نجم رمضان اللي فات، إن الجزء التاني من مسلسل الاختيار هيكون من بطولة النجم كريم عبد العزيز، والنجم أحمد مكي، اللي كان بيحضر للجزء السادس من “الكبير أوي”، واتخلى عنه علشان يكون من ضمن ملحمة “الاختيار”.
الاتنين نجوم صف أول وعمرنا ما كنا نتخيل إن في شركة إنتاج تقدر تتحمل أجور الاتنين سوا، كمان من سنين طويلة أحمد مكي بينتج مسلسلاته من خلال شركته، ودي أول مرة نشوفه بيتعاون مع شركات تانية.
نسل الأغراب
يمكن شوفنا أمير كرارة مع أحمد السقا في فيلم هروب اضطراري، بس التعاون بينهم في التليفزيون هيبقى مختلف جدًا، ومبهر، وكمان بيئة خصبة للمشاكل والإشاعات.. اتسربت أخبار لمشاكل مع الكومبارس وحالة فوضى كبيرة في اللوكيشن، وكمان طلعت إشاعات إن في خلاف بين السقا وكرارة، وعلشان كده نشر السقا صور ليه مع كرارة وكتب تعليق كده، فهمنا منه إنهم كانوا مختلفين واتصالحوا.
مسلسلات راجعة من رمضان 2020
كلنا فاكرين عاصفة التنين اللي اتقفلت كل حاجة من بعدها، وقتها كان مسلسلات كتير بدأت تصوير وبتصارع الزمن علشان كان فاضل على رمضان أقل من شهر ونص، ولما وقف التصوير المسلسلات دي اتعطلت لدرجة إنها مالحقتش الموسم من أصله، بس هما السنة دي راجعين وبقوة.
تقاطع طرق
بعد نجاح مسلسل منى زكي الأخير “أفراح القبة” سنة 2016، دخلت في موجة كده من عدم التوفيق صابت كل أعمالها، وبدأت الأعمال تتأجل وتتلغي، منها مسلسل “إيزيس”، ومسلسل “نمرة اتنين”، وفيلمها الأخير “الصندوق الأسود”، وطبعًا مسلسل رمضان 2020 “تقاطع طرق”، اللي كان من بطولتها هي و”محمد فراج” و”محمد ممدوح”، وهينزل السنادي أخيرًا.
هجمة مرتدة
لأول مرة من حوالي 20 سنة، الشاشة الصغيرة تجمع بين أحمد عز وهند صبري، بعد ما كان انطلاقهم مع بعض في فيلم “مذكرات مراهقة”، راجعين في بطولة مسلسل “هجمة مرتدة” اللي متاخد من ملفات المخابرات المصرية وبتدور أحداثه في الستينات.
المسلسلات دي خلص تصويرها بالكامل من قبل رمضان بـ 3 شهور، ودي حاجة نادرة وعمرنا ما كنا بنشوفها في المواسم اللي فاتت، علشان كانوا الممثلين بيفضلوا يصوروا لحد آخر شهر رمضان كل سنة.
ظواهر تانية
السنة دي في أكتر من زوجين في العالم الحقيقي، هيمثلوا قدام بعض في مسلسلات رمضان، أبرزهم عروسين رمضان اللي فات ياسمين عبد العزيز وأحمد العوضي، اللي داخلين سوا مسلسل جديد، بيكتبوا عمرو محمود ياسين مؤلف مسلسل ياسمين السنة اللي فاتت، وهيكون اسمه “اللي مالوش كبير”.
وأخيرًا ماننساش المسلسلات اللي عملت دراما كبيرة على أرض الواقع، زيّ مسلسل “موسى” اللي واجه مصير مجهول واتوقف تصويره 3 شهور كاملين بسبب أزمات محمد رمضان مع النقابة اللي كلنا تابعناها، وكمان دراما باسم سمرة ورحاب الجمل اللي شوفناها على السوشيال ميديا والتليفزيون.