في بيان من الدكتور طارق الجمال، رئيس جامعة أسيوط، قال إن فريق من طلاب كلية الهندسة فازوا بالمركز الخامس على مستوى العالم في مسابقة “Student Design competition” واللي بتتعمل كجزء من فعاليات مهرجان الهندسة اللي بتنظمه “الجمعية الأمريكية للمهندسين الميكانيكيين” في الولايات المتحدة، وفاز الفريق المصري بالمركز الخامس على مستوى العالم عن تصميم روبوت بيشتغل بالمياه.
وقال لنا الدكتور شحاتة غريب، نائب رئيس جامعة أسيوط لشئون التعليم والطلاب، إن المسابقة دي هي مسابقة روبوتات هدفها هو نشر استخدام الطاقة المتجددة بأنواعها المختلفة كل سنة، وبتوفر فرصة للفرق الطلابية علشان يبدعوا في استخدام مصادر الطاقة المتجددة في تشغيل الميكانيكا والروبوتات.
وكشف الدكتور نوبي محمد حسن، عميد كلية الهندسة، إن الفريق الطلابي بيضم مجموعة من الطلاب كلهم من فرق دراسية مختلفة في قسم الميكانيكا والميكاترونيكس في كلية الهندسة، وإن المسابقة بتنظمها “الجمعية الأمريكية للمهندسين الميكانيكيين” كجزء من فاعليات مهرجان الهندسة في الولايات المتحدة الأمريكية. وقال إن فوز فريق كلية الهندسة جامعة أسيوط بيؤكد على إن الكلية فيها عناصر متميزة من الطلاب بيشتغلوا بكل مجهودهم علشان يجددوا مكانتهم وياخدوا أماكن أكبر في كل المحافل الدولية، وبيحاولوا بكل قوتهم يمثلوا جامعة أسيوط بطريقة مٌشرفة لهم وللجامعة ككل.
وخلال الكلام مع الدكتور عزت عبدالمنعم مرغني، وكيل كلية الهندسة لشئون التعليم والطلاب، قال إن الفريق بيتكون من 7 طلاب وهما: نزار إبراهيم، كريم صلاح، محمد عبدالرضي، خالد جمال، حسن كمال، رمضان محمد، إسلام عبدالهادي. وقال إن المسابقة اتعملت تحت إشراف الدكتور أحمد سعد، الأستاذ المساعد في قسم الهندسة الميكانيكية، والمهندس رامي عنتر، المعيد بقسم الهندسة الميكانيكية، وإن المسابقة السنة دي هي تصميم وتصنيع روبوت بيشتغل بالمياه كمصدر دفع وطاقة وحيد في محاكاة لفكرة عمل التوربينات والسدود.
ولسه الفريق الطلابي لحد لحظة كتابة المقال في الولايات المتحدة بيشارك في فعاليات المسابقة، وأكد الفريق سعادته الكبيرة بالمركز اللي وصلوا له في المسابقة، وأكدوا إنهم تعبوا جدًا في الفكرة وتنفيذها، وإنهم خدوا الموضوع جد جدًا من أول لحظة وعلشان كده قدروا يطلعوه بنتيجة مشرفة جدًا.