العيد فرحة، ومن فرحة العيد دخول السينما، وعلشان كده شركات الإنتاج بتركز على إنتاج عدد كبير من الأفلام في العيد علشان ترضي أذواق الجمهور.
وفي المقال ده هنتكلم عن أهم ست أفلام عربي هيتعرضوا في عيد الفطر 2023. يلا بينا!
ابن الحاج أحمد
الفيلم من إخراج معتز التوني وأول بطولة مطلقة لشيكو، بمشاركة مجموعة من النجوم؛ زيّ سيد رجب وعايدة رياض ورحمة أحمد فرج.
بيحكي الفيلم عن شاب اسمه (أحمد) بيشتغل بياع في محل بقالة بتاع والده، وبيدخل في مشاكل كتير ويلاقي نفسه واقف ضد عصابة خطيرة، ويتعرف على بنت اسمها نبيلة تساعده في مواجهة الخطر.
خمس جولات
الفيلم من إخراج مازن أشرف، وبطولة آدم الشرقاوي وماجد المصري ونور النبوي وداليا شوقي، ومعاهم المطربة المصرية وعازفة العود عايدة الأيوبي.
بيحكي الفيلم قصة شاب مصري بيمارس رياضة فنون القتال المختلطة، وفي رحلة طويلة على مدار أحداث الفيلم بيتحدى الشاب نفسه والظروف اللي حواليه علشان يثبت موهبته، وفي جزء من الفيلم بيتكلم عن حياة مغنيين الراب.
ساعة إجابة
الفيلم من إخراج مصطفى أبو سيف، وفكرة أحمد شيكو اللي شارك في التأليف مع ورشة شيرين علاء للكتابة، وبيشارك في البطولة سليم مصطفى وسوسن بدر وأيتن عامر ونجلاء بدر.
وبيحكي عن خلاف بيحصل بين طفل وأبوه وأمه، وبعدها يتمنى الطفل إن أبوه وأمه يتغيروا، ولما بتتحقق أمنيته بيلاقي نفسه في بيت جديد ومع عيلة جديدة وعايش مغامرة جديدة.
يوم 13
الفيلم من إخراج وتأليف وائل عبد الله، ومن بطولة أحمد داود ودينا الشربيني وشريف منير وأروى جودة ونسرين أمين ومحمود حافظ، ونجوم تانيين.
وبيحكي الفيلم قصة رعب عن عز الدين اللي بيرجع من برا مصر بعد ما فضل بعيد عن البلد سنين طويلة، بيرجع عز يدور على أهله، ويعيش في في قصر عيلته اللي بيواجه فيه مغامرة مرعبة ماكانش عامل حسابها خالص.
رمسيس باريس
من إخراج أحمد خالد موسى، ومن تأليف كريم حسن بشير، وبيشارك في البطولة الفنانة اللبنانية هيفاء وهبي، ومحمد سلام ومصطفى خاطر وحمدي الميرغني ومحمد ثروت، ومجموعة من النجوم.
بيحكي الفيلم قصة حب بين إيزابيل بنت المحتل الفرنسي حاكم رشيد، وبين شاب مصري هو سليم. في ليلة جوازها من شاب فرنساوي بتهرب إيزابيل، بس أبوها يلاقيها ويبعتها فرنسا.
في فرنسا، بتلجأ إيزابيل لساحر مغربي علشان يجيب لها سليم، فيديها شكمجية فيها مخدرات تبعتها لسليم علشان يوصل فرنسا، بس يتقبض على سليم وتفضل الشكمجية علشان توصل لشاب في العصر الحديث.
شوجر دادي
من إخراج محمود كريم، ومن تأليف لؤي السيد، وبيشارك في البطولة ليلى علوي ومحمود حميدة وبيومي فؤاد وتامر هجرس وحمدي الميرغني و مصطفى غريب، والمفاجأة هي ظهور الراقصة جوهرة لأول مرة في تجربة تمثيل حقيقية، في دور مختلف عن دور الراقصة التقليدية.
بيحكي الفيلم قصة في إطار كوميدي عن راجل بيمر بأزمة منتصف العمر، وفي نزوة مراهقته المتأخرة بيدخل في علاقة سرية مع راقصة، وده اللي يسبب قلبان في حياته وحياة أسرته.
هارلي
الفيلم من إخراج محمد سمير، ومن تأليف محمد سامي ومحمد سمير مبروك، ومن بطولة محمد رمضان ومحمود حميدة ومي عمر وأحمد داش ومي كساب، ومجموعة من النجوم.
بيحكي الفيلم قصة هارلي مهندس الميكانيكا اللي راجع من الخليج مع عيلته علشان يكمل دراسته في مصر، وبسبب ذكائه وسرعته يشتغل هارلي مع عصابة ويبقى أهم فرد فيها والأقرب لقلب زعيم العصابة.
قل لنا في الكومنتات إيه الفيلم اللي متحمس تشوفه من دول، ولو كان في فيلم ماتذكرش في المقال، قل لنا عليه برضه.
آخر كلمة: ماتفوتوش قراءة: ليه مابقيناش نشوف أعمال لـ “فوازير رمضان” زيّ زمان؟