قررت الحكومة المصرية زيادة سعر رغيف الخبز المدعوم، واللي كان بيتم بيعه بـ 5 قروش لمدة 30 سنة، ووضحت الدولة إن الطبقات الأكثر حاجة والمهمشة من المواطنين مش هتتأثر بزيادة الأسعار دي، على حسب كلام رئيس الوزارء مصطفى مدبولي.
وملاحظات مدبولي جاءت بعد بضعة شهور من إعلان الرئيس عبدالفتاح السيسي إن الوقت قد حان لزيادة أسعار الخبز المدعوم، وقال نصًا: “مش معقولة نبيع 20 رغيف عيش بثمن سيجارة وبعملة ماحدش يعرفها”. في إشارة لسعر بيع رغيف الخبز بـ 5 قروش.
وأضاف السيسي على هامش افتتاحات مدينة السادات في أغسطس 2021: “مش معقولة أبيع رغيف العيش بصاغ، وهي عملة ولادنا مايعرفوش عنها حاجة”. ووضح: “مشروع حياة كريمة هيغير حياة سكان الريف في مصر”.
وأضاف السيسي: “بيقولوا ماحدش يقرب من رغيف العيش! لأ هنقرب، لأننا جادين وشرفاء”.
وتابع السيسي: “بقول للرأي العام مش هنقدر.. داخل في مشروع حياة كريمة عشان نغير حياة الناس.. مابقولش ناخد رقم كبير، لكن ناخد من هنا، عشان نضيف لموضوع التغذية المدرسية”.
وبالرغم من إن السيسي أكد إن الدولة مش هتزود سعر رغيف الخبز المدعوم أوي، وإن سعر البيع مش هيوصل لسعر الإنتاج أبدًا. ولكن مجموعة من أعضاء البرلمان عبروا عن مخاوفهم من إن وزارة التموين والتجارة الداخلية ممكن تستغل توجيهات السيسي كضوء أخضر علشان ترفع الدعم بالكامل عن رغيف الخبز.
وعلى هامش توجيهات الرئيس الأخيرة اجتمع نواب من حزب التجمع اليساري وطالبوا بفتح حوار شعبي بمشاركة البرلمان ومنظمات المجتمع المدني، علشان يناقشوا قضية دعم الخبز، ووضح النواب إن 30 في المية من الشعب المصري بيعيش تحت خط الفقر.
والحكومة في الوقت الحالي بتوفر الخبز المدعوم لعشرات الملايين من المصريين بنظام كروت الغذاء. وقال مدبولي في مؤتمر صحفي يوم الأربعاء الماضي إن الحكومة حاليًا بتؤسس لنظام جديد بغرض رفع أسعار الخبز المدعوم، وأكد إن الحكومة هتفضل توفر الدعم لرغيف الخبز بالرغم من زيادة الأسعار.
وقال مدبولي خلال المؤتمر الصحفي إن الحكومة حاليًا بتدرس تطبيق زيادة بسيطة ولكن منتظمة في أسعار الخبز المدعوم.
وأشار مدبولي إن سعر رغيف الخبز المدعوم كان بيكلف الدولة 17 قرش لما الدولة زودت سعره لـ 5 قروش في 1988، أما النهارده فالرغيف المدعوم بيكلف الدولة 65 قرش، ولسه سعره 5 قروش زيّ ما هو.
وأكد إن الزيادة في سعر الرغيف هيتم تطبيقها بالفعل ولكن مع التأكيد على إن الطبقات الأكثر حاجة مش هيتأثروا بالزيادة دي.