سبب فيلم بشتاقلك ساعات ضجة كبيرة بين الجمهور المصري، وعلى مواقع التواصل الاجتماعي بعد ما اتعرض في مهرجان برلين السينمائي الدولي، أما عن سبب الجدلية فهو جرأة الفيلم في طرح قضية المثلية الجنسية بين الرجال، حيث إن قصة الفيلم بتحكي قصة حب بين شابين، وبتيجي الثورة الأخيرة بخصوص فيلم بشتاقلك ساعات بعد فترة قليلة جدًا من الثورة اللي سببها فيلم أصحاب ولا أعز واللي كان واحد من أسباب إثارته للجدل هو تناوله شخصية رجل مثلي برضه.
وبيناقش فيلم بشتاقلك ساعات اللي تم إنتاجه بتعاون مصري ولبناني وألماني، قضية المثلية الجنسية في الوطن العربي، والمشاكل اللي بتواجه الرجال المثليين في علاقاتهم داخل المنطقة العربية.
وثارت ثورة الجمهور المصري من غير ما يشوفوا الفيلم وقرروا إن الفيلم قاصد مصر بالذات لإن أغلب أبطاله مصريين، ولإن الفيلم من تأليف وإخراج واحد مصري، واستخدم أكتر من أغنية مصرية لعمرو دياب، وأنغام، ومطربين عرب تانيين زيّ نانسي عجرم.
أما عن حبكة الفيلم فبتناقش علاقة حب بين شابين وبتتحول الدراما في القصة لتوتر وقلق بين العاشقين بسبب العلاقات المتعددة لطرف منهم، واللي بيعتبرها الطرف التاني خيانة له.
وانقسمت الآراء بين الجمهور ونشطاء السوشيال ميديا، ما بين ناس شافت إن تناول الأفكار دي في السينما حاجة كويسة، وإن ده دور السينما في ثقافة أي مجتمع، على حسب كلامهم.
والبعض الأخر جادل إن الفيلم بيسيء لمصر وللمصريين، وبمجرد طرح البوستر الرسمي للفيلم، انفجر الجمهور بموجة هجوم شديدة على الفيلم واللي اشتغلوا فيه، واعتبروه حاجة شريرة بتهدم قيم المجتمع المصري والعربي، واعتبروا إن في توجه واضح لنشر الأفكار الغربية داخل المجتمع العربي.
ومش بس كده، ده كمان اتقدم المحامي أيمن محفوظ بإنذار لرئاسة الوزراء المصرية يوم الثلاثاء وطالب فيه بإسقاط الجنسية المصرية عن مخرج الفيلم، واتهمه بالترويج للمثلية الجنسية.
أما مخرج الفيلم محمد شوقي حسن، فعلق على الهجوم اللي اتوجه للفيلم وقال إن قضية المثلية الجنسية مش هي المحور الرئيسي للفيلم، بالعكس، كل قضية الفيلم بتتلخص في التعرض لتجربة الزمان والمكان والعلاقات المتوازية في نفس الوقت.
وقال حسن، خلال مداخلة تليفونية مع واحدة من القنوات الأجنبية، إنه بدأ العمل على الفيلم من أكتر من تلات سنين، وتم تصويره في سنتين، واستوحى فكرته من المجموعة القصصية المعروفة ألف ليلة وليلة، وعلشان كده اعتمد على السرد في الخلفية واللي قامت فيه المطربة المصرية دنيا مسعود بدور الراوي.
أما الناقد المصري طارق الشناوي فقال في مداخلة تليفونية مع برنامج “حديث القاهرة” مع الإعلامي خيري رمضان، وكريمة عوض، على قناة القاهرة والناس، إنه تواصل مع مخرج فيلم “بشتاقلك ساعات” وأكد إنه عبارة عن علاقة مثلية بين شخصين لكن الفيلم مش بيناقش قضية المثلية بالسلب أو الايجاب ومش بيدافع ولا بيروج للمثلية.
وقال الشناوي، إن فيلم بشتاقلك ساعات، بيتعرض حاليًا ضمن فعاليات الدورة الـ 72 لمهرجان برلين السينمائي، ومش هيتعرض في مصر، ووضح إن الفيلم مش مصري حتى لو كان المخرج بتاعه مصري، درس في الولايات المتحدة، لكن الفيلم دايمًا بيتبع جهة الإنتاج، والفيلم ده تابع لشركة إنتاج ألمانية وبالتالي نقدر نعتبره ألماني.