في سابقة تعتبر الأولى من نوعها في السعودية، افتتحوا مطعم رعب في بوليفارد سيتي بيعيش الزبون تجربة العشا وهو قاعد جانبه شبح! الطاولات مصممة على أساس إن كل واحد يقعد وجانبه الشبح بتاعه وده علشان يضفي نوع من الترفيه عليهم.
فكرة المطعم ممكن تكون مختلفة عن مطاعم الرعب التانية اللي بتتعمل في إنها بتقدم الأكل بطريقة طبيعية وغير مرعبة يعني الناس اللي بيقدموا الأكل مش بيتعمدوا إنهم يخوفوا الزبائن، بس هتلاقي إن الصحون اللي بيتقدم فيها الأكل مكونة من مجسمات مرعبة.
وبجانب ده بيستمتع الناس اللي بتروح هناك بعروض من الرعب بشكل متقطع، 24 ممثل بيقدموا عروض مختلفة مدتها من 10 دقايق لـ12 دقيقة، وفي نفس الوقت بيعرضوا فيلم لايق على الجو وبيتوافق مع العروض في السيناريو والمشاهد. ومواضيع الرعب اللي بيستخدموها زيّ الزومبي والمهرجين والأشباح والمجانين، وكل واحد منهم على حدة، وبيقدروا أثناء العرض إنهم يتفاعلوا مع الجمهور. يعني هتلاقي شبح جيه قعد جانبك مرة واحدة وبيسألك “عامل إيه؟”
وفي فترة بيتم فيها تقطيع الرعب حوالي 15 دقيقة، علشان الناس ماتحسش بالزهق ويحاولوا برضه يكسروا المود، وتضاء فيها القاعة كلها وبيشغلوا مزيكا لحد ما الناس تبدأ تطلب الأكل.. المطعم ده تم افتتاحه في واحدة من مناطق موسم الرياض السنة دي ولسه الفعاليات مكملة ولسه هنشوف إيه الجديد!