وأسدل الستار على “العصفورة” عصفورة تويتر اللي كانت جزء من هوية تويتر لسنين، بعد ما قرر الملياردير إيلون ماسك إنه يستبدلها بصورة كلب من سلالة “تشيبا إينو” في إشارة منه للعملة المشفرة “دوج كوين”
وكعادة العرب عمرهم ما هيعدوا الموضوع كده من تحت إيدهم، تخيل أنت معايا واحد عربي صحي لقى التطبيق اللي كل يوم متعود يدخل عليه بعد ما يصحى وقبل ما ينام شعاره اتغير واتحط مكانه شعرطار العملة المشفرة “دوج كوين” بدون أي تمهيد.
ردود الفعل كالعادة انقسمت ما بين مؤيد للفكرة وشايف إنها خطوة ممكن يحصل فيها استفادة وسط نظام عالمي بيعاني، ويقدر من خلال الخطوة دي يجمع له قرشين، والجانب التاني كان رافض الفكرة وشايف إن ده هدم لهوية تويتر اللي متعودين عليها واللي ياما شافت واستحملت خواطرنا والـ”اوڤر ثينكينج” اللي كان بيطلع عليها بليل.
ولكن الطابع الهزلي كان هو الغالب عليهم وشافوا التحول الكبير اللي هيحصل لتويتر من بعد تغيير الشعار في إنه هيبقى من “زقزقة العصافير” لـ”هوهوة كلب” ومن تويتة هتكتبها هتلاقي مكتوب في وصف المنشور بدل تغريدة لـ”نباح”.
وناس تانية شايفة إنه مادام إيلون ماسك متمسك أوي بالشعار الجديد لازم يغير اسم تويتر من أساسه علشان الطقم يكمل ويبقى كله لايق على بعضه، أما بقى فئة المبدعين والمبتكرين قعدوا يتخليوا ويرسموا شكل الشعار لما يتغير.
وفئة تانية شايفة “فلوسه ويعمل اللي على مزاجه” وقرروا ينسحبوا في هدوء ويقفلوا تويتر ويروحوا لمكان يقدرهم.
الجدير بالذكر إن بعد ما إيلون ماسك غير الشعار نشر محادثة عمرها بيرجع لسنة لمستخدم كان بيطلب منه الطلب ده واقترح عليه نفس العملة وقال على الصورة “زي ما وعدتكم” .. ياسلام لو نقدر نوفي بوعودنا بالسهولة دي.