بث مباشر أقل ما يقال عنه إنه صادم وبشع، بيتحكي في قصص الرعب والأفلام بس، لكن حمادة العجوز، حققه على أرض الواقع. جريمة بشعة حصلت في الدقهلية، والجاني صوّر فيديو مباشر جنب جثة زوجته بعد ما دبحها وفصل راسها عن جسمها، والجريمة ماخلصتش لحد هنا، المتهم بعت راسها لأهلها!
تفاصيل الجريمة
المتهم ذبح مراته، قدام أولاده التلاتة، وفصل راسها عن جسمها، ومثّل بجثتها قدام أولادهم وقدام الناس في فيديو مباشر، وقال فيه: “يا أهل الخير.. أنا مش هنزل من فوق إلا لما ييجي حد من القنوات يصور معايا ويعرف قضيتي وإيه اللى حصل معايا وخلاني في الوضع ده.. كل ده من أجل 3 بنات كان نفسي أكون معاهم في الدنيا سواء حلوة أو وحشة.. فيه أو مافيش بتمنى أعيش معاهم”.
وقال: “حسبي الله ونعم الوكيل في كل واحد شارك إنه يبعدني عن أطفالي.. وحسبي الله ونعم الوكيل في الظالم اللي كان جاي يقتلني الليلة دي وجري.. حسبي الله ونعم الوكيل في الظالم اللي كان جاي يشاركها في قتلي النهارده وعايز يبعدني عن عيالي .. والله ما هسيب حق عيالي”.
الجريمة البشعة شهدتها قرية (تيرة) التابعة لمدينة (نبروه) بمحافظة الدقهلية شمال مصر، صباح يوم الأحد، ولما انتقلت قوة أمنية لموقع الحادث، لقوا إن الزوج حمادة العجوز، قاعد جنب جثة زوجته مفصولة الرأس وبيتكلم في بث مباشر على صفحته على فيسبوك، ولما حاول ضباط المباحث القبض عليه، مسك أولاده التلاتة وهدد بدبحهم، والولاد شهدوا الجريمة كلها ومثّل بجثة أمهم قدام عينيهم، وكل ده في فيديو مدته 23 ثانية عبارة عن رعب.
كواليس قبل الجريمة
اللي وصلت له التحقيقات لحد دلوقتي، إن الجريمة في كواليسها خلافات نشبت بين الزوج وزوجته اللي عمرهم 26 سنة ومتجوزين من 9 سنين، وإنهم كانوا في خلافات كتير في الفترة الأخيرة وبالفعل انفصلوا لمدة سنتين، لكن تم الصلح بينهم من أسبوعين ورجعت المجني عليها لبيت الزوجية، علشان يقتلها المتهم بعد أيام معدودة من رجوعها.
ماتحاولش تدوّر على الفيديو وأنت بتقرأ الأخبار، لإنه فيديو مؤذي نفسيًا بطريقة بشعة، لإن للأسف خيال مؤلفين الرعب اتنقل للحقيقة، والأفلام اللي ناس كتير بتخاف حتى تتفرج عليها بقت واقع.