قرب نص الليل، في شارع كوبري البحر الصغير في مركز ههيا في محافظة الشرقية، الأهالي سمعوا أصوات استغاثات وصريخ، الكل جري ناحية الصوت وفجأة لقوا راجل وست على الأرض غرقانين في دمهم، وفي شخص بيحاول يهرب، لكن قدروا يمسكوه بمساعدة المباحث بعد كده. إيه الجريمة اللي حصلت في وسط الشارع في الشرقية امبارح؟
الأجهزة الأمنية تلقت بلاغ بإن عامل عنده 49 قتل زوجته وشخص آخر صاحب عربة لبيع العصائر والحلويات في الشارع على كوبري البحر الصغير.
والتحريات الأولية كشفت إن الزوج كان بيشك باستمرار في سلوك زوجته، وعلى اعتقاد بوجود علاقة عاطفية بتجمع المجني عليهم، ولما الزوج شاف زوجته قاعدة مع المجني عليه سيطر عليه الغضب وطعنهم بسلاح أبيض حتى الموت.
وتم ضبط المتهم ويدعى “السيد. ح” وشهرته “كتكوت” وبحوزته السلاح المستخدم في الواقعة، ونقل المصاب إلى مستشفى ههيا المركزي لتلقي الإسعافات الطبية والعلاج اللازم، والتحفظ على الجثة تحت تصرف جهات التحقيق في مركز شرطة ههيا، اللي طلبت تحريات المباحث حول الواقعة وملابساتها.
في صحف تانية بتقول إن المجني عليه ماتوفاش، وهو دلوقتي مصاب بجرح قطعي وبيتلقى العلاج في المستشفى، وبالانتقال والفحص تبين من التحريات الأولية مقتل السيدة على يد زوجها، اللي أنهى حياتها بواسطة سلاح أبيض (سكين)، وأصاب المجني عليه التاني بجرح قطعي.
الجريمة البشعة دي حصلت في وسط الطريق لمجرد شكوك، لكن المجني عليهم كانوا في وضع عادي مش وضع مخل يثير الشكوك، التحقيقات والتحريات مستمرة علشان تكشف عن كل تفاصيل الجريمة ودوافعها.