من الواضح إننا هنفضل لسه في حرب على التنمر والمتنمرين لحد ما يختفوا، مع كل الحملات اللي ضد التنمر، لسه في ناس مش مفهوم هدفهم إيه غير إن هما بيهاجموا ويجرحوا البشر من غير أي وجه حق، حتى لو انت مغلطش في حد ولا أثارت الجدل، هتفضل برضه معرض للتنمر والتعليقات السخيفة طول ما إحنا في وسطنا ناس زيّ دول، لكن بالردود المنطقية المهذبة يمكن يعرفوا غلطهم ويفكروا قبل ما يتكلموا.. ممكن!
في يوم واحد، نشوف تعليقين في قمة الوقاحة، أثاروا الجدل، الأول على صفحة يسرا اللوزي على بوست نزلته عن حلقة ليها في برنامج وبتشكر جمهورها، لكن واحد من المتابعين قرر إنه يسئ ليها من غير أي سبب حتى وعايرها بإن بنتها صماء، لكن رد يسرا كان حقيقي درس في ردع التنمر وكل الناس احترمتها على هدوئها واحترامها وردها اللي خلاها تكبر في نظر الناس أكتر.
وتضامن الفنانين والمتابعين مع يسرا اللوزي وحيوها على ردها.
أما التعليق التاني، على بوست للفنانة سوسن بدر، بتنعي فيه وفاة المخرج حاتم علي، وعلق أحد المتابعين “عقبالك”، لكن سوسن بدر ردت بمنتهى الهدوء والاحترام اللي خلاها تكبر هي كمان في نظر الكل.
ودعمها محبيها والفنانين على السوشيال ميديا واتمنولها الصحة والعمر وحيوها على ردها.
والتعليقات السخيفة القاسية موقفتش لحد هنا، كمان باسم يوسف اتعرض لنقد وتعليقات من التنمر على اهتمامه بالطبخ، وكتب بوست بيوضح فيه اللي بيتعرضله.
لكن حصل رد غير متوقع على البوست ده، من الإعلامي شريف مدكور، بيفكر باسم إنه كان بيتريق عليه بنفس الطريقة في برنامجه.