جريمة بشعة حصلت في حي السيدة زينب في القاهرة، أجهزة الأمن قبضت على 3 متهمين ذبحوا صديقهم أحمد عويس، اللي بيشتغل تاجر أغنام، علشان يسرقوا منه 80 ألف جنيه، وتم ضبط سلاح الجريمة المستخدم والمتهمين قتلوا المجني عليه علشان يسرقوا منه المبلغ اللي كسبه من شغله في تجارة الأغنام.
بشاعة الجريمة ماوقفتش لحد هنا، المتهمين رموا الجثة في مخزن لحوم في المنطقة، وكشفت التحريات إن الشهود شافوا 3 شباب بيتخانقوا مع شخص في شوارع المدبح لكن اختفوا بسرعة، وبعدها بساعات تم العثور على جثة المجني عليه وفيها طعنات قاتلة بالجسم والرقبة، والجثة مرمية جوا مخزن للحوم.
كاميرات المراقبة كشفت هوية الجناة، وتبين إن الأصدقاء الأربعة اجتمعوا خلال حفل زفاف واتخانقوا مع المجني عليه وبعدها استدرجوه لمخزن للحوم وانهالوا عليه بالطعنات حتى الموت، والتحقيقات أثبتت إن المتهمين ارتكبوا الجريمة لسرقة 80 ألف جنيه كانت مع صديقهم من متحصلات تجارته في بيع الأغنام، وإن الجريمة ابتدت نواياها عند المتهمين بمجرد ما عرفوا إن المجني عليه -صديقهم- بيمتلك المبلغ ده، واتفقوا على استدراجه لسرقة المبلغ لإنهم بيمروا بأزمة مالية، فقرروا يقتلوا صاحبهم علشان يسرقوه.