كلنا في شهر رمضان بندور بعد الفطار على أماكن جديدة نتسحر فيها وتعيشنا أجواء رمضان، هنتسحر فين وهناكل إيه، وهنسمع مين، وعلشان ماتدورش كتير جبنا لك الخلاصة عن خيمة “الصحبجية”. وده بعد ما شوفنا حفل الافتتاح، اللي كان يوم 6 أبريل، بحضور النجوم أحمد سعد وهشام عباس، وبعد ما شوفنا الأجواء الرمضانية الجميلة هناك واتحمسنا أكتر إننا نتكلم عنها.
السنة دي خيمة الصحبجية جاية لينا برعاية شركة “تعمير” للتطوير العقاري، اللي بتقود المجال من سنة 1954 لحد دلوقتي، واشتغلت على إحياء التراث المعماري. وبتنظم الخيمة السنة دي شركة “Stage Entertainment”، وهي شركة جديدة ورائدة في مجال تنظيم الإيفنتات.
ليه خيمة الصحبجية؟
خيمة الصحبجية هي واحدة من أوائل الخيام الرمضانية اللي اتعملت في مصر من التسعينات لحد الألفينيات، والأكل اللي بيتقدم فيها في وقت السحور هو من عند مطعم “تمارا” اللبناني. ولو خايف يفوتك أي ماتش كورة، ماتقلقش لإن في الصحبجية هتلاقي شاشة عرض كإنك قاعد في السينما بالظبط، هيتذاع عليها يوميًا ماتشات دوري أبطال أوروبا.
ولو ليك في الطرب الأصيل وبتحب السلطنة، هتسمع أم كلثوم وعبد الحليم حافظ وفايزة أحمد، ولو بتحب نجوم الجيل، هتلاقي كل ويك إند سهرة مع نجم بتحبه زيّ عمر كمال ومحمود العسيلي، ومن قبلهم شوفنا مصطفى قمر وأحمد سعد. ومش بس كده، ويوم الجمعة جايبين محمد فؤاد وعبد الباسط حمودة.
أروح ازاي؟
في الأول، هتحجز عن طريق تيكيتس مارشيه، وتقدر تشوف مين هيبقى النجم اللي موجود في اليوم اللي هتروح فيه.
وبالنسبة للمكان، الخيمة موجودة في “كمبوند ازاد”، اللي هتلاقيه جنب الجامعة الأمريكية في التجمع الخامس. ومن الجدير بالذكر، تم تصميم المكان على أحدث طراز وبشكل خاص، علشان يدي الضيوف فرصة للانغماس في أجواء رمضانية ملهاش مثيل.
