في خناقة بقالها كام يوم شغالة بين الفنان محمد صبحي وتركي آل الشيخ وتصريحات من الطرفين وكل واحد بيرد على التاني والناس كلها قاعدة بتتفرج.. طب الموضوع بدأ ازاي؟
الموضوع بدأ بتصريحات لمحمد صبحي قال فيها إنه رفض عرض كان بملايين الدولارات لتقديم عمل مسرحي على هامش موسم الترفيه في السعودية. وإنه بيرفض السفر للسعودية علشان يقدم عمل فني. لإنه بيرفض كفنان يقدم فن تحت عنوان الترفيه. وقال “أنا مش مرفهاتي، الفن جزء من الترفيه والمتعة. وإنه شايف إن في مبالغة في سفر المصريين هناك ومن الأحسن نسيب السعودية هي اللي تثبت نفسها بأعمالها.”
وأضاف: “مصر لها ريادة من 120 سنة في الوطن العربي، وكان لها دور في تقديم ألمع النجوم. وإن السعودية كانت مجتمع منغلق لسنين. وبقالهم سنة واحدة بس حصل فيها الانفتاح الفني، والسعودية النهارده بتشغل الفنانين المصريين”.
“لازم أقول برافو وفرحانين. طول عمرنا نقول ليه السعودية مفيهاش فن.. كنت أتمنى إن السعوديين هما اللي يقودوا الصحوة الفنية”.
ورد عليه تركي آل الشيخ نصًا “والله أنا أبي أعرف اللي عرض الملايين عليه. نبي نكشف على قواه العقلية.. عموماً تراجع ولعها افتكروني في السكة بس جت غلط”. ورد على تغريدة للشاعر توفيق الخليفة هاجم فيها محمد صبحي “هو مشخصاتي يا أخ توفيق”.
وبعدها نزل محمد صبحي على صفحته بوست الناس اعتبرته رد على اللي قاله تركي بس من غير ما يوجه كلامه بشكل مباشر وقال “أشفق على جاهل يتألم من جهله”
والتصريحات دي كانت بالتزامن مع تصريح لحسن الرداد بيقول فيه “والله أنا عايز أعيش هنا، الرياض دلوقتي مكان استراتيجي وملتقى النجوم في العالم العربي. وبيطلع منها أعمال فنية كتيرة جدًا. وشوفنا حاجات ونجوم عالميين زيّ سلمان خان وأنا مبسوط جدًا. وتحس إنك في مكان فيه كل الحاجات الفنية اللي عايزها، سواء مسرح أو سينما أو حفلات غنائية، وسعيد إن في مكان يهتم بالفن بشكل كبير وبجودة عالية”