تجربة اتعرضت لها، توهت في الطريق والموبايل فصل شحن، وماكانش في حد يقدر يساعدني على وصف الطريق علشان أرجع، وحتى الناس اللي قابلتها ماكانتش عارفة توصف، وبعد ما قدرت أشحن الموبايل واستخدم الـ GPS وروحت بأمان، خطر في بالي سؤال.. هو احنا قبل التكنولوجيا والموبايلات كنا بنعرف الطرق والاتجاهات ازاي؟ اللي بيسافر زمان كان بيعرف منين المكان اللي رايحه؟ ولما دورت كان في طرق كتير بدائية كانت بتُستخدم لحد ما ظهر شكل التطبيقات اللي بنستخدمها دلوقتي.
الشمس والأشجار في النهار والنجوم والقمر بليل
الشمس
كانوا بيدوروا على مكان مافيهوش أي معوقات يقدروا من خلاله يشوفوا الظل بوضوح، ويغرسوا عصا طويلة ومستقيمة وبيثبتوها كويس لمنع حركتها بفعل الرياح، وبتحديد طرف الظل اللي اتكون من العصا، بتبقى العلامة دي بتمثل اتجاه الغرب للجسم في أي مكان على سطح الأرض، وبالطريقة نفسها بعد مرور 15 دقيقة، وفي حال كان المكان في نصف الكرة الشمالي فالظل هيتحرك باتجاه عقارب الساعة، وبكده هتبقى النقطة الثانية بتشير إلى اتجاه الشرق، أما لو كنت في نصف الكرة الجنوبي فالظل هيتحرك بعكس اتجاه عقارب الساعة، وبرسم خط يوصل النقطة الأولى بالنقطة الثانية (الشرق والغرب) هتقدر تحدد اتجاه الشمال والجنوب من خلال الوقوف بجانب الخط الشرقي الغربي، بحيث تكون العلامة الأولى اللي بتشير للغرب على الشمال، والعلامة الثانية اللي بتشير للشرق على اليمين.
عناصر الطبيعة
من العناصر اللي موجودة من الطبيعة كانوا يقدروا يحددوا الاتجاهات وخصوصًا اتجاه الشمال، يعني عندك مثلًا الطحالب على الأشجار، معروف إنها عادة بتنمو على الجانب الشمالي للأشجار، والأشجار نفسها في العادي اللحاء بتاعها بيبقى باهت، ففروعه بتمتد للسماء في الجانب الشمالي منها، لإنه مش بيستقبل كتير من آشعة الشمس، وبالتالي هو بيكون اتجاه الشمال والمقابل له الجنوب.
برضه ظاهرة ذوبان الثلوج، علشان بتدوب بشكل أسرع على الجانب الجنوبي الأكثر دفئًا على الصخور والجبال، ده غير بيوت النمل اللي كانوا يقدروا من خلالها تحديد اتجاه الجنوب والشرق بسهولة، لإنهم كانوا بينموا في الاتجاه ده.
القمر
أما بالنسبة لليل، فكانت بوصلتهم هي القمر، بيحددوا اتجاه الشرق والغرب اعتمادًا على مسار حركة القمر اللي بينطلق من الشرق وتنتهي بالغرب، وبعدها لتحديد الشمال والجنوب بيترسم خط وهمي بين طرفين الهلال من فوق لتحت، ونقطة تلامس الأفق بتمثل اتجاه الجنوب في نصف الكرة الشمالي، واتجاه الشمال في نصف الكرة الجنوبي.
النجوم
عن طريق 3 كوكبات استخدمهم العرب، هما كوكبة الدب الأصغر وكوكبة الدب الأكبر وذات الكراسي، للاستدلال على مكان النجم القطبي، واللي بيمثل اتجاه الشمال، وده بسبب إننا كنا نقدر نشوفه في أي وقت في الجزء الشمالي من الكرة الأرضية.
البوصلة
دي من أهم وأشهر الطرق اللي كانت بتُستخدم، حتى في البحر، بس محتاجة فهم الآلية وكل أجزاءها علشان يسهل تحديد الاتجاه، بتحطها على راحة اليد أمام الصدر مباشرة بطريقة مسطحة، وبتستنى اتجاه السهم المغناطيسي في البوصلة، مكان توقفه هيشير لاتجاه الشمال، وبعد كده تقدر بسهولة تحديد باقي الاتجاهات.
هو قالك فين؟
بالخبرة بتاعت الناس وبمرور السنين، اتحفظت الأماكن وبدؤوا يحطوا علامات وتتنقل للأجيال وتتورث، لإن وقتها الطرق ماتغيرتش زيّ دلوقتي، ولا كان ظهر كباري ولا العمران كان اتطور بالشكل ده، وساعد ده بشكل من الأشكال ظهور الخرايط، ومع الخبرة وتوقف الناس عن استخدام الطرق القديمة، بدأ يظهر “الفتي” ويقولك “هو قالك فين” وبيتوهك أكتر ما أنت تايه أصلًا، فكان لازم وقت ظهور التكنولوجيا يبقى لها دور في الموضوع ده.
فكانت خرائط جوجل من أهم الخدمات اللي اتقدمت، وعن طريق صور تم التقاطها من الأقمار الصناعية، قدروا يعملوا خدمة الخرائط على الموبايلات، وماكتفتش ببيان لأسماء الشوراع، لأ دي حددت المطاعم والبنوك ومحطات الوقود والسوبر ماركت اللي حواليها، والوقت اللي هتاخده في مشوارك.
الخلاصة إن كان في طرق كتير أوي كنا بنستخدمها زمان علشان نحدد الطرق، لكن التكنولوجيا سهلت كتير منها وقت ومجهود، وبقى تحت إيدنا قاعدة كبيرة من المعلومات بضغطة زرار نقدر نعرفها.