خان الخليلي مش مجرد شارع في القاهرة اتسمى على اسم سلطان، أو مجرد علم سياحي من ضمن الأعلام السياحية في مصر، دي قصة هتسمعها وتشوفها، هيحكيها لك الشارع وأنت بتتمشى في شوارعه الضيقة اللي مليانة دفا وألفة.
حكاية أقدم وأعرق سوق في الشرق الأوسط
كان مصدر إلهام لكتاب ومبدعين وأدباء منهم العالمي نجيب محفوظ اللي كتب عنه واتحول لفيلم اسمه خان الخليلي، كتب الرواية من وحي أجواء الحي القديم وهو بيوصفها بيقول:
“ستجِد في الشارع الطويل، عِمارات مُربعة القوائم تصِل بينها ممرات جانبية تقاطع الشارع الأصليّ، وتزحُم جوانب الممرات والشارع نفسه بالحوانيت؛ فدُكان للساعاتي وخطاط وأخر للشاي، ورابع للسجاد وخامس للتُحف وهكذا. بينما يقع هُنا وهناك مقاهي لا يزيد حجم الواحدة منها عن حجم الحانوت (الدُكان) الصغير، وقدّ جلسَ الصنَّاع أمام الدكاكين يكبون على فنونهم في صبر”
شارع عمره أكتر من 600 سنة، اتسمى نسبة للسلطان جاهركس الخليلي واحد من سلاطين المماليك الجراسكة وأسسه سنة 1382على أنقاض مقابر الخلفاء الفاطميين.
واللي اتعرفت باسم “تربة الزعفران” وكان لها رسوم وعوائد بيحرص عليها كل الخلفاء الفاطميين من حيث زيارتها والتردد عليها وإنارتها والتصدق أيام الخلافة الفاطمية. بس لما قرر جهاركس إنه يبني الخان نبش في تربة الزعفران واتخلص من العظام اللي كانت موجودة. وكانت حجته وقتها إن الفاطميين كانوا كفار لإنهم على المذهب الشيعي.
وبيعتبر واحد من 38 سوق موزع أيام المماليك على محاور القاهرة واللي بيميزه إنه لسه محافظ على أبنيته القديمة بشكلها المعماري القديم.
المؤرخ العربي المقريزي بيقول في وصفه إن الخان عبارة عن مبنى مربع كبير بيحيط بفناء يشبه الوكالة، بتشمل الطبقة السفلية منه الحوانيت “الدكاكين”، وفي الطبقات العليا المخازن والمساكن.
سوق لكل العصور
في حارات خان الخليلي هتلاقي القطع الأثرية الفرعونية متقلدة بحرفية ودقة شديدة، والمشغولات النحاسية والأرابيسك اللي تخطف العين لو وقعت عليها، ومن الحاجات اللي بتجذب السياح هناك اللبس الشعبي المصري زيّ العبايات وبدل الرقص الشرقي والملايات اللف والطربوش والبرقع.
ده غير محلات الفضة اللي بتضم أرقى المشغولات الفضية واللي مش هتلاقيها غير في خان الخليلي وعليها إقبال شديد من العرب والأجانب. وأنت مكمل في طريقك هتلاقي مصنوعات جلدية ونحاسية لها مكان مخصص في الخان، ومش مصدر جذب للسياح بس لأ، ده يعتبر مكان دايم بيروح له العاملين في مجال التمثيل علشان يشتروا اللبس والإكسسوارات التاريخية اللي بيستخدموها في الأعمال التاريخية، وبتظهر على التلفزيون زيّ السيوف والخوذ النحاسية والأحزمة.
ولو ليك في البخور وبتحب ريحته هتلاقي تشكيلة من البخور المستوردة من السودان، وبخور العود اللي بيتم استيرادها من السعودية، ودخان المستكة اللي بيعتقد الناس بإنها بتمنع العين والحسد، وبخور الكسبرة اللي بيسموها “الفك والفكوك”.
ده غير أوراق البردي اللي عليها رسوم وكلمات هيروغلوفية وتمائم وأيقونات وقصائد غزلية، ونقوشات بتروي حكاية إيزيس وأوزوريس.
ولو عايز ترتاح هناك هتلاقي الكراسي والترابيزات اللي تبع القهاوي الموجودة في الخان، وهتلاقي قهوة الفيشاوي أقدم وأشهر قهوة اتأسست سنة 1769، تشرب فيها أحلى كوباية شاي.