هل تم هدم وإزالة أشجار حديقة أنطونيادس التاريخية في الإسكندرية؟

انتشرت أخبار على السوشيال ميديا خلال الأيام الماضية عن هدم أسوار حديقة أنطونيادس التاريخية وقطع أشجارها وتدمير النباتات النادرة اللي موجودة فيها. الخبر الحزين ده دق ناقوس الخطر على الهوية الأثرية والهوية الخضراء لمدينة الإسكندرية العريقة.

حديقة أنطونيادس بين الأمس والحاضر

تم انشاء حدائق أنطونيادس في العصر البطلمي في مصر، وتعتبر من أقدم حدائق مدينة الإسكندرية، وكمان أقدم الحدائق اللي تم إنشاءها في العالم، وكانت موجودة في الحي القديم اللي كان اسمه إيلوزيس أو “جنات النعيم”، وعاصرت أحداث تاريخية بارزة، سواء في العصر البطلمي أو العصور اللي جات بعده.

في القرن التسعتاشر كانت الحدائق مملوكة لواحدة من أثرياء اليونانيين، وكان اسمها “حدائق باستيريا”، وبعد ما بقت ملك لمحمد علي باشا حاكم مصر، بنى فيها قصر خاص بيه، وفي سنة 1860، أسند الخديو إسماعيل مهمة إعادة بنائها للفنان الفرنسي “بول ريشار” اللي أنشأها كنموذج مصغر من حدائق قصر فرساي في باريس، واللي كان الخديو أقام فيها في واحدة من زياراته لفرنسا وانبهر بجمالها.

في الوقت ده كانت مساحة الحدائق حوالي 50 فدان، وبعد كده وخلال عهد الخديو إسماعيل تمت توسعتها لحد ما وصلت لتسعين فدان، وأضاف ليها عدد كبير من الأشجار والنباتات النادرة. تضم الحدائق مجموعة من التماثيل الرخامية النادرة لشخصيات أسطورية وتاريخية بالحجم الطبيعي

بعد كده انتقلت ملكية الحدائق لواحد من الأثرياء هو البارون اليوناني جون أنطونيادس سنة 1860، واللي اتخذت اسمها المعاصر منه، وبعد وفاة أنطونيادس انتقلت الملكية لأبنة أنطوني، اللي نفذ وصية أبوه وأهدى القصر والحدائق لبلدية الإسكندرية سنة 1918.

حديقة هدم الحديقة وقطع أشجارها

وضحت الدكتورة بدرية حسن مديرة حديقة أنطونيادس بالإسكندرية، إنه ماتمش قطع أي شجر في الحديقة، وقالت إن الحديقة دخلت مرحلة تطوير شاملة، وأكدت إن عملية التطوير دي هـتنقل الحديقة نقلة تانية تليق بمكانتها التاريخية والسياحية.

أما الدكتورة صفاء فاروق الأستاذ في مركز البحوث الزراعية بالإسكندرية، فـوضحت إن حديقة أنطونيادس كانت تابعة لمركز البحوث الزراعية من سنة 1986، ولكن كانت مهملة بشكل كبير بالذات في مجال الري واتملت بالسوس والقوارض وأكدت إن حالة المسطحات الخضراء فيها سيئة جدًا، وبالتالي جات توجهات رئاسية بدخولها مرحلة التطوير.

وأكدت فاروق إنه تم تسليم حديقة أنطونيادس في نفس الوقت اللي تم تسليم حدايق تانية في الإسكندرية لبدأ عمليات التطوير فيها، واللي منها حدائق المنتزهة والنزهة والمعمورة. وقالت إنه بالشكل ده بقت الحدائق دي خارج إدارة المركز.

أشارت فاروق كمان إن التطوير والصيانة هـيشمل ملامح الحديقة الخارجية زيّ إعادة صيانة الأسوار الداخلية والخارجية وتقليم الأشجار النادرة وتنظيف الممرات ورفع المخلفات. وأكدت مرة تانية إنه ماتمش إزالة أي أشجار واللي تعتبر تاريخية وجذور بعضها يمتد لحوالي 12 متر.

الدكتور هاني النجار؛ الأستاذ بكلية الزراعة في جامعة الإسكندرية، قال إن الإهمال اللي اتعرضت له الحديقة خلال السنين اللي فاتت خلى النباتات والمسطحات الخضراء في حالة سيئة بالذات بسبب إنعدام مياه الري، وقال إنه مادخلش للحديقة مياه ري بخلاف مياه الأمطار من سنة 2013.

آخر كلمة: ماتفوتوش قراءة: مهرجان سور الأزبكية: كتب وروايات بكل الأنواع بأسعار ماتتصدقش