بعد حوالي شهر من انفجار مرفأ بيروت البشع اللي أدى لخسائر روحية، ومادية ماتتعدش، الشعب اللبناني بيشهد دلوقتي كارثة تانية، وهي حريق ضخم مفاجئ في المرفأ، نفس المكان اللي حصل فيه كارثة الانفجار، وهرب العمال بأقصى سرعة من الموقع أول ما الحريق بدأ.
الجيش والدفاع المدني اللبناني بيحاولوا يطفوا الحريق دلوقتي، وصرح المسئولين إن الحريق بدأ في مستودع للزيوت، والدواليب، وإن المواد المشتعلة قد تكون مش خطرة، وقالوا إن السبب مجهول. والصليب الأحمر صرح أنه مفيش أي إصابات، ولكن الدخان الأسود سبب لناس كتيرة ضيق تنفس.
الحريق سبب ذعر، وقلق كبير عند الناس اللي شاركوا خوفهم على مواقع التواصل الاجتماعي بصور وفيديوهات للحريق، وعبروا عن غضبهم معلقين أنهم مش قادرين يعيشوا في الإهمال ده، وأن نفسهم يعيشوا في أمان.
عن: تويتر ![]()
عن: تويتر
واللبنانين قالو إنهم لو عندهم مقدرة أنهم يمشوا ويسيبوا وطنهم، هيمشوا، وأنهم في حالة بكاء مستمرة، والناس في البيوت، والمكاتب قاعدين تحت الترابيزات لأنهم خايفين يطلع الحريق بنفس كبر، وبشاعة الإنفجار اللي فات، وبيتسائلوا ازاي مفيش أي إجراءات احترازية اتاخدت بعد انفجار المرفأ الشهر اللي فات في نفس المكان.
آخر كلمة: الشعب اللبناني بيعيش في صدمة، ومعاناة مستمرة مع كارثة ورا التانية..