ناس كتيرة بقت بتحب تكسر القواعد والعادات التقليدية لما ييجوا يخططوا لأجمل يوم في حياتهم، يوم فرحهم. وبالرغم من إن إحنا مبقناش نستغرب لما نشوف أفراح نمطها مختلف شوية عن الطبيعي، أكيد هتستغرب -زينا- لما تشوف وتسمع عن الفرح ده، اللي قدر يجمع بين مكونات الفرح المصري التقليدي، من مأذون، فستان فرح وبدلة، وزغاريط، ومعازيم، وحتي التربيزات، بس كلها تحت المياه!
أصحاب واحد من أغرب (وأمتع) الأفراح اللي حصلت في 2020 هما الغطاس المصري صدام الكيلاني صاحب أطول غطسة في مصر، ومحاولة كسر الرقم القياسي لأطول غطسة في العالم في موسوعة جينيس، وزوجته الأسبانية بيا ليجورا. ومع إن ده ماكنش أول فرح يتعمل تحت الماء في البحر الأحمر، كان الجديد في الفرح، هو الخامة اللي اتصممت بيها بدلة وفستان الفرح اللي اتعملوا مخصوص ليهم من خامات بدل الغطس المضادة للمياه.
الفرح ابتدى من على شاطئ البحر في دهب بالاحتفالات والزغاريط من ومن هما بينزلوا المية، وكملوا الاحتفال حتي وهما بيغوصوا في البحر، والفرح ده اتحضرله بشكل استثنائي لمدة 5 شهور كاملة علشان يقدروا يجهزوا كل تفاصيله الاستثنائية ويبقي فرح متكامل.
وقال صدام إن المأذون كان واحد من أصحابه اللي كان حريص علي الحضور علشان يكمل شكل الفرح التقليدي، وكانت الزوجة متخوفة من الفكرة علشان مش هتبقي تحت الأضواء، إلا أن صدام حرص على إنه يوفرلها كل حاجة تحسسها إنه فرح متكامل.
عبر صدام عن حبه للفرح لأنه كان بسيط، وهو ده اللي كان محتاجه علشان يحس بالسعادة الحقيقية يوم جوازه. فقدر أنه يحظى بالفرح المثالي بالنسباله، وفي نفس الوقت متكلفش مبالغ باهظة زي الأفراح التقليدية.