قصة البطلة أماني أو اللي أطلقوا عليها “سوبر أماني” انتشرت على السوشيال ميديا في الساعات اللي فاتت، بشهامة وشجاعة خلتها تخترق المياه لوحدها ومن غير ما تفكر علشان تنقذ 4 أطفال وسيدتين من الموت بعد ما عربيتهم وقعت في المياه.
الأخبار اللي انتشرت قالت إن الواقعة حصلت في منيا القمح في محافظة الشرقية، أماني كانت في طريقها لشراء مستلزماتها، وفي الطريق شافت الناس متجمعة بتتفرج وتصور حادثة غرقت فيها عربية جواها 4 أطفال و2 ستات، والعربية وقعت في المياه والمصابين بيواجهوا الغرق، ماترددتش وجريت علشان تنقذهم وطالبت الناس إنهم يساعدوها في إنقاذهم بدل من المشاهدة والتصوير.
واستعانت بقطعة حديد من أحد المحلات الجانبية في المكان، وجريت على العربية اللي بتواجه الغرق وكسرت زجاجها وبدأت في إخراج الأطفال، وقالت: “لحقتهم على آخر نفس، وعملت لهم الإسعافات الأولية لإنقاذهم، كانوا بيموتوا خلاص، والحمد لله ربنا كتب نجاتهم على إيدي”، وفضلت أماني مع الأهالي والناجيين لحد ما وصلوا مستشفى الزقازيق الجامعي، وبالفعل تم استقبالهم.
ده اللي انتشر للقصة من ساعات، لكن دلوقتي حصل جدال عن مدى صحة القصة، واليوم السابع نشرت إن في روايات تانية مضادة تماما ظهرت، ومصادر في الشرقية نفت وقوع الحادث من الأساس وأنه لم يُسجل سقوط سيارة فى أي ترعة بالمحافظة، وكمان وسائل إعلام قالت إن الفتاة اختلقت القصة وأكدوا إن الشرقية لم تشهد حادث بالتفاصيل دي، والصور اللي انتشرت مع القصة صور لحادثة قديمة، وكل ما فى الأمر إن أماني كانت بتبحث عن الشو والترند.
كمان أشخاص كتير من اللي نشروا قصة أماني وبطولتها امبارح على السوشيال ميديا، عدلوا البوست وقالوا إن في تضارب في الروايات. ومنهم اللي مسح القصة من الأساس.