انسى كل اللي فات، انسى الحكم والمواعظ اللي سمعناها بسبب القصة دي، انسى المعارك والقضايا وكل اللي شوفناه على الهواء، شيرين عبد الوهاب تعلن رسميًا رجوعها لحسام حبيب، ولو ماكنتش مصدق زينا، كتب الكتاب كان متذاع وشوفنا صور وتعليات من الفنانة شيرين بنفسها مش نسخة تانية منها.
العلاقة العاطفية الأشهر على الساحة الفنية والمجتمعية في 2022 بتفاصيلها، من حب وأغاني لطلاق وقضايا محاكم واتهامات بالسرقة والاعتداء والعنف الأسري، لحلاقة شعر شيرين، لـ “يا معافر اجمد كمل للآخر” لـ “القماص” وكل التفاصيل اللي كانت في وقت من الأوقات مافيش ترند غيرها، يبدو إن الثنائي الأشهر السنة دي قرروا يختموها مرة تانية بـ “حبه جنة أنا عيشت فيها” ونتمنى مايحصلش أي حاجة تانية لحد آخر السنة علشان يبقى ده الختام.
مفاجأة كتب الكتاب
فجأة، والناس كلها قاعدين في يوم جمعة وبيستمتعوا بوقت فاضي وبيقلبوا على السوشيال ميديا، اتفاجئوا بأخبار ملت التايملاين كله.. عودة شيرين وحسام وكتب كتابهم.
في البداية، ناس كتير افتكرتها إشاعة بينشرها البعض على السوشيال ميديا لمجرد إعادة إحياء ترند يكسبهم شوية مشاهدات ولايكات، وإذ فجأة تتنشر صور وفيديوهات كتب الكتاب وبعض التعليقات كمان من شيرين نفسها، ونتفاجئ إن كل ده متذاع في برنامج الحكاية مع الإعلامي عمرو أديب، فنروح نفتح التليفزيون ونشوف الآتي:
ردود أفعال الناس طبعًا كانت كتير، وكانت بتوصف كل حاجة.. وزي ما شيرين نفسها قالت هي كل شوية بتودينا وتجيبنا، كمان الناس كانت شايفة وجهات نظر مختلفة.
الكرامة في ذمة الله
ده كان شعار الناس اللي شايفة وجهة النظر إن شيرين رجعت لعلاقة هي كانت بتقول عليها كل السلبيات اللي سمعناها على الهواء على لسانها هي نفسها.
شيرين وهي خارجه من المصحة رايحة ترجع لحسام حبيب تاني
Posted by Masa Safwat on Friday, November 11, 2022
شيرين رجعت لحسام😂😂😂
Posted by Sheren Al-Talouli on Friday, November 11, 2022
شيرين كل متقفش على حسام وتطلق وحسام يرجعها تاني
Posted by Abdo Said on Friday, November 11, 2022
شيرين ضحية
على الجانب الآخر، في ناس كان صعبان عليها شيرين ومش مصدقين تصرفاتها، وشايفين إنها واقعة تحت تأثير كبير من شخصيات غيرها هما اللي متحكمين في حياتها واختياراتها وفارضين عليها سيطرتهم، وإن قرارها مش من دماغها، وشايفين إنها بتدمر اللي باقي من حياتها، وشايفين كمان إن الضغط اللي الناس بتعمله دلوقتي بيخلّي اللوم على شيرين وهي الضحية، وماينفعش نلوم الضحية.
الشاهد على الحكاية
الإعلامي الكبير عمرو أديب في برنامجه “الحكاية” اللي كنا بنشوف فيه تفاصيل حكاية شيرين وحسام، وشيرين بنفسها كانت بتعمل معاه مداخلات في برنامجه وتتكلم براحتها. والحقيقة ده فيه ميزة كبيرة وهي إن الكلام كان بيجي من مصدر موثوق مش مجرد كلام على النت أو على لسان الفنانة، وجود برنامج كبير يعتبر منصة إعلامية الناس بتثق فيها، بيكون عامل مهم وثقة بين الجمهور وكمان الفنان بنفسه. لكن عمرو أديب وهو شاهد على الحكاية كلها، رد فعله لوحده كان بيعبر عنه الفيديو ده:
الفصل الأخير في القصة
شيرين وعدتنا إن دي آخر صفحة في القصة هتكون في العلن، وإنها هتقفل على كل الحاجات الشخصية دي ومش هنسمع عنها غير الفن اللي مفروض نسمعه.
وحسب اللي قالته، الغلط كان في نشر تفاصيل مشاكل شخصية في العلن، وإن ده اللي اتسبب في إن المشاكل تكبر والناس تكون جزء منها.. في النهاية، بنتمنى تكون دي النهاية السعيدة للفيلم!