محمية كهف وادي سنور، أقدم كهف في العالم، موجودة على بعد ٦٠ كم من جنوب شرق محافظة بني سويف، وهي بتعتبر من أهم الأماكن السياحية في مصر، خصوصاً لقربها من القاهرة بحوالي ٢٠٠ كم. وادي سنور من أهم الكهوف في العالم لأنه نادر، وفريد من نوعه، ومفيش حاجة شبهه غير كهف لوراي في ولاية فيرجينيا، ومغارة جعيتا في لبنان.
تكون الكهف بسبب تفاعلات كيميائية للمياه الجوفية (المياه اللي تحت الأرض) واختلاطها بالحجر الجيري، والتفاعلات دي أنتجت رخام الألباستر، وهو من أحلى، وأحسن، وأغلى أنواع الرخام في العالم، وفيه تكوينات كلسية وصخرية جميلة، اتكونت على مدار ملايين السنين، بيستخدموها في صناعة أواني الزينة. وبيمتد الكهف ل٧٠٠ متر في باطن الأرض، وعمقه ١٥ متر باتساع ١٥ متر.
اكتشف محمية وادي السنور عُمال المحاجر في المنطقة في أوائل التسعينات بالصدفة وهما بيدوروا على رخام، وتم إعلانها كواحدة من محميات مصر الطبيعية في ١٩٩٢، وعلماء الچيولوچيا قالوا إن المحمية دي موجودة من أيام العصر الإيوسيني الاوسط يعني من ٤٠ مليون سنة فاتوا.
قرر محافظ بني سويف الدكتور محمد هاني غنيم من فترة إنهم يطوروا المحمية لمكان سياحي بيئي وجيولوجي علشان يجذب السياح للمكان من كل بلاد العالم، وبالفعل خطتهم نجحت، وبقى مكان موجود على خريطة مصر السياحية.
الكهف حالياً مُحاط بطرق دائرية، وجبال صخرية بأشكال جذابة مختلفة، وهو مكان جذاب للسياحة بالألوان المكونة ليه، وأشكاله اللي واخدة شكل شعاب مرجانبة، وأشجار، وزهور بأحجام مختلفة، وكمان مكان مناسب ثقافياً، وعلمياً للباحثين ودارسين الچيولوچيا.