نزل امبارح فيديو كليب جديد للفنان تامر حسني والفنان محمود العسيلي باسم “اختراع”، وزي ما احنا متعودين في أغلب كليباتهم، حقق الدويتو الجديد ضجة كبيرة على السوشيال ميديا من لحظة نزوله، خصوصاً إن الأغنية بتجمع بين اتنين من أكبر الفنانين الموجودين على الساحة دلوقتي زي تامر والعسيلي.
مقطع الفيديو لقى نجاح كبير، واتصدر تريند اليوتيوب في ساعات معدودة، بالاضافة لمواقع التواصل الاجتماعي اللي كانت بتتكلم عنه خلال أول لحظة نزل فيها.
في أول الكليب، هنلاقي تامر والعسيلي لابسين نفس البدلة، وبيقيموا حفل زفاف مزدوج في مكان على البحر بريسيبشن مختلف عن أي فرح تقليدي. مش كل يوم بنشوف عرسان بيدخلوا أو بمعني أدق “بينزلوا” فرحهم على زحليقة، مش كدة؟
الأغنية حققت مليون مشاهدة خلال أول 15 ساعة فقط، وهي من كلمات أحمد حسن راؤول، ومن ألحان أحمد سعيد، وتسجيل هيثم راضي، وتوزيع وسام عبد المنعم. والمفاجأة كانت إن الكليب من إخراج تامر حسني، وتم تصويره والعمل عليه في الساحل الشمالي خلال الأيام القليلة اللي فاتت.
والأغنية هتبقى ضمن ألبوم تامر حسني الجديد اللي من المُقرر طرحه منتصف شهر سبتمبر اللي جاي، واللي هيحمل اسم “خليك فولاذي”.
مش بس معجبين تامر و العسيلي هما اللي انبسطوا من الأغنية، كتير من النجوم و الفنانين العرب أبدوا إعجابهم بيها، وهنأوا كل اللي شاركوا في العمل على طرح الكليب. ومن النجوم دول، رنا سماحة، وراندا البحيري، وريم البارودي، وعازفة الماريمبا نسمة عبد العزيز، وسمية الخشاب، ورامي صبري.