مش لو رجعنا بالزمن، لا، لو كان الزمن هو اللي فضل مكمل لحد دلوقتي، ولسه في عصر محمد علي، تتخيل هنكون عايشين ازاي؟ رغم إن الفترة دي تُعتبر أكبر فصل تاريخ درسناه وذاكرناه، بس ممكن ماتبقاش عارف بالظبط شكل الحياة كان عامل ازاي، مش بس من ناحية اقتصادية أو سياسية، الحياة على أرض الواقع كانت عاملة ازاي، الناس عايشة ازاي، الشوارع والبيوت، تفتكر لو كنا لسه لحد دلوقتي في الزمن ده، كنا هنبقى عاملين ازاي؟
الشوارع
من أشهر الحاجات اللي قام بيها محمد علي كانت نظام البنية التحتية، اللي اتعملت بشكل ممتاز واستمرت سنين هي اللي شايلة شوارع مصر، يعني الناس وقتها كانت بتتمتع لأول مرة بشبكة طرق وصرف صحي ومياه بشكل مخطط. وغير البنية التحتية، محمد علي كان من أوائل اللي اهتموا بإنشاء قناطر وترع، ومنتزهات عامة وحدايق، يعني كان زماننا بنستمتع بأجواء مختلفة في شوارع جديدة مليانة أشجار وحدائق.
الهوية
في اعتقادنا، دي كانت أكتر حاجة هتفرق لو كنا لسه في نفس الزمن، لإن الهوية هي أكتر حاجة اتأثرت بالزمن اللي احنا فيه دلوقتي. محمد علي كان بيحرص على تمييز الشخصية المصرية عن هوية الشعوب المجاورة لنا، وكان بيقوي وجهة النظر دي بشكل عملي من خلال المناهج التعليمية، وكمان في الجيش، وفي خطب المساجد، فالمصريين وقتها كانوا مميزين عن شعوب الدول اللي حواليهم، رغم إن مصر كانت ضمن الخلافة مع عدد من الدول، لكنها ماكانتش تابعة، كان لها هوية وشخصية مميزة.. لكن تفتكر لو كنا في نفس الزمن ومعانا السوشيال ميديا، الوضع كان هيبقى ازاي؟
اللبس
محمد علي اهتم إنه يبني مصانع، مش بس يعتمد على اللي بنستورده، وده قلب الآية وخلّى مصر هي الوجهة وهي المتحكمة في السوق بشكل كبير، أنت اللي بتصنّع والناس تاخد منك مش العكس. أكيد وقتها كانوا بيتمتعوا بأقمشة كتير يقدروا يستغلوها بأشكال مختلفة، ده غير إن الموضة وقتها كمان كانت بتعتمد على أقمشة عالية الجودة من الحرير والقطن المصري والخامات اللي مش موجودة دلوقتي بشكل كبير، يعني كان زماننا بنلبس خامات نضيفة جدًا، بس بموضة بتجمع بين الخامة الحلوة والموديلات بقى الجديدة من كل مكان، بس بلمستنا.
الشغل
وقتها، محمد علي اهتم إن الشباب تتعلم حرف كتير، وكلهم مختلفين، وكان في بعثة للتعليم في الخارج، كانت تحديدًا البعثة الرابعة وكانت في فرنسا وإنجلترا والنمسا، علشان يتعلموا حرف زيّ نقش الدهان والسراجة وطبع السيوف وإنشاء السفن وإنشاء الأجواخ. وغير الحرف الموجودة بالفعل ومنتشرة في المجتمع المصري، لو كنا في نفس الزمن، شغل الهاند ميد كان هيبقى بشكل تاني خالص، لإنه مش بس هيعتمد على الهواية، هيتم دعم الهواية والموهبة بالتعليم لحرف مختلفة، وأكيد كنا هنكتشف مجالات جديدة كمان.
الفن
لحد دلوقتي بنشوف الناس قد إيه مبهورة وهما بيزوروا قصر عائشة فهمي، تخيل إن المقتنيات دي من عصر محمد علي وأسرته؟ محمد علي اهتم بالفن والثقافة وازدهارهم في عصره، وده نتج عنه كنوز بمعنى الكلمة، غير الإنشاءات، اللي تعتبر فعلًا فن مش مجرد تشييد وبناء، لحاجات زيّ مسجد محمد علي اللي موجود في قلعة صلاح الدين، ومسجد الرفاعي، وكل الآثار المبنية بفن مش بس هندسة ومعمار. وكمان في المجوهرات، لو اتفرجت على مقتنيات أسرة محمد علي في المتاحف وركزت في المجوهرات، كانت بتبقى تحف فنية حقيقية مش مجرد زينة.