اليومين اللي فاتوا، انتشر خبر ضبط مصنع غير مرخص بيصنع قهوة وشاي بمواد غير صالحة للاستخدام الآدمي، وبيدخل في التصنيع بودرة البلاط والجبس، ومن وقتها ناس كتير اتكلمت عن الموضوع وإنهم فعلًا حسوا بتغيير في طعم القهوة دي، وكانوا بيشكوا في تذوقهم. المصنع اللي تم ضبطه كان بيصنع بكميات كبيرة كانت بتغزو السوق وموجود في محافظة الغربية.
الفيديو اللي انتشر بضبط المصنع كان واضح فيه منتج القهوة المغشوشة بتتصنع بصورة غير آدمية وبتتحط في أكياس تابعة لإحدى الشركات المتخصصة، وبيزور علامات تجارية لشركات كبرى لإنتاج الشاي والقهوة والحلويات، والكميات اللي تم ضبطها كانت 5 مليون عبوة و3 أطنان خامات.
النسكافيه والكوفى ميكس فى ذمة الله🖤🫂
السوق كله مضروب… بودرة بلاط.. وانا اقول النسكافيه طعمه متغير ليه
👈 لا بقولك ايه.. متعملش فيها متأثر.. وانك انضحك عليك.. الطعم كان باين من زمان بقالنا 3 سنين واكتر النسكافيه والكوفى ميكس ذى الزفت ولو حد عمله لنا مش بنشربه.. وكل حاجة بقى طعمها ماسخ بس انت اللى عندك ملل من كتر الضغط النفسى وكنت مفكر العيب فيك معنتش مستطعم حاجة.. بس انت ذى الفل متقلقش.. دخل جسمك بودرة بلاط وأسمنت وحصى فاضلك سيخين حديد ونطلع بالرابع 😂Posted by دحيح زراعه on Tuesday, January 24, 2023
البرلمان المصري اتحرك بشكل رسمي ضد الواقعة، وتقدم النائب محمود قاسم بطلب إحاطة للحكومة، وطالب بتكثيف الحملات الرقابية على مختلف الشركات والمصانع اللي بتقوم بإنتاج وتصنيع السلع الغذائية.
وتقدم النائب شحاتة أبو زيد، عضو لجنة الصناعة بمجلس النواب، بطلب إحاطة آخر للحكومة لاتخاذ إجراءات عقابية تمنع انتشار الأغذية المغشوشة والمضروبة وإغلاق المصانع اللي بتعمل بدون ترخيص، وبتستخدم مواد غير مطابقة للمواصفات، وده بيعرض صحة المواطنين للخطر وبيؤثر بالسلب على الصناعة.