كل شوية بيطلع تحديث جديد لتشات جي بي تي يلفت الأنظار، بس التحديث والنموذج الجديد كان أشد رعبًا بسبب ميزاته اللي بتحاول تزيح الجنس البشري عن المهام الطبيعية اللي المفروض يقوم بها.
فمن النهارده ومع النموذج اللي أطلقته شركة “أوبن إيه آي” “تشات جي بي تي-4O″، يقدر التطبيق يعمل محادثات صوتية ودردشات واقعية وفيديو مع البشر، زي “أنت عامل إيه النهارده؟” “اتغديت؟” “إيه اللي مضايقك بس؟”.
وبقى يقدر بسهولة يكلمك على حسب مودك ومشاعرك في الوقت الحالي بمعنى تاني “هيحس بيك” لو أنت متعكنن هتلاقيه بيكلمك بنبرة فيها مساواة وطبطبة، وتقدر تقاطعه ويحللك مشاعرك واللي بتحس بيه زي أي دكتور نفسي ببلاش وكل ده بشكل مباشر بعد ما كانت الميزات دي كانت صعبة على المساعد الصوتي في تطبيق الذكاء الاصطناعي.
ده غير إن لو بتواجهك أي مشكلة سواء تقنية أو وأنت موجود في مكان معين مش عارف تتصرف ازاي تقدر تبعت له صورة بتوضح المشكلة عن طريق لقطات للشاشة مثلًا وهو يقولك تعمل فيها إيه زي أي صديق وقت الضيق، ويقدر ببساطة يترجملك لايف أي لغة سواء بتتكلم بيها أو باعتها لك مكتوبة.
التحديث الجديد للتطبيق قادر على الاستجابة للمطالب الصوتية للمستخدمين في أقل من 232 مللي ثانية في بعض الأوقات، وبمتوسط 320 مللي ثانية، وده رقم مشابه لوقت الاستجابة البشرية في المحادثات، يادي الرعب!
آخر كلمة: ماتفوتوش قراءة: ماهر القاضي: مصري يقود المستقبل باكتشافاته وابتكاراته العلمية