مسلسل نسل الأغراب عامل ضجة من قبل حتى ما يتم عرضه في رمضان وقت ما نزل البرومو، ضجة للأسف من النوع السلبي اللي بسببها شوفنا على مدار الـ 30 يوم من رمضان، كوميكس وميمز بتقلل من العمل من حيث الحبكة الدراميا وكمان التمثيل اللي شافوا البعض مبالغ فيه، ده غير أدوار الشخصيات الأساسية في المسلسل، اللي بعض الجمهور ماقدرش يشوف مصداقية في تقديمهم لشخصية الصعايدة، اللي العمل كله قائم على أساسها. لكن ده لا ينفي كمان، إن المسلسل حقق نسب مشاهدة عالية جدًا.
وبعد انتهاء المسلسل بحلقات بسيطة، اتفاجئنا بإعلان شركة المتحدة بتوقف التعامل مع المخرج محمد سامي دون إبداء أسباب للقرار. بعد انتشار الخبر ده بسرعة البرق على صفحات التواصل الاجتماعي، مش بس الجمهور وعامة الشعب اللي علقوا سواء بالدعم أو الهجوم، لكن كمان من بعض الفنانين سواء كان ليهم علاقة بآخر عمل لمحمد سامي أو لأ. فمن أوائل الفنانات اللي اقترن اسمهم بالتعليق على اللي حصل كانت الفنانة أنغام اللي كتبت ستوري “الحمدلله” على صفحتها بالانستجرام، واللي استنتج منها الناس إنها ردًا على محمد سامي بعد ما استبعدها عن غناء رباعيات وتتر المسلسل بعد حدوث بعض الخلافات في وجهات النظر.
وشوفنا بعد كده post للفنانة مها أحمد هجمت فيه فنانين اللي كان من السهل استنتاج إنهم أبطال نسل الأغراب الفنان أحمد السقا والفنان أمير كرارة، وهجمتهم بشدة لدرجة وصفها لأحدهم “بالندل” واتهمتهم إنهم موقفوش جنبها كما ينبغي وانتهى بيهم المطاف إن ممثلة مبتدئة -على حد كلامها- هى اللي بقيت بطلة عليهم. وبعد المنشور ده، سيول من ردود الأفعال (اللي كان معظمها هجومية) تصدرت صفحات النجوم وأقارب الفنانين اللي اتهجموا، على السوشيال ميديا.
رد كل من والدة وأخت أحمد السقا ودافعوا باستماته عنه وعن شهامته اللي معروف بيها وسط الفني كله، وهاجموا بحده مها أحمد على الكلام اللي قالتوا. فقامت فاطمة السقا أخت أحمد السقا بعمل منشن لمها أحمد في بوست كتبت فيه إن الشخص اللي هى مقدرتش تذكر اسمه لكن قدرت تقول عليه “ندل” اللي هو أحمد السقا، وقف جنبها وجنب زوجها مجدي كامل بدل المرة ألف، وبعد العشرة الطويلة دي مش قادرة تشوف غير حقد وسواد وابتسامة كدابة. أما والدة السقا فاتهمت مها إنها كومبارس فاشلة بتدور على الشهرة بطريقة بذيئة. ولكن بعد شوية وقت، قاموا الاتنين بحذف منشوراتهم عن مها أحمد.
وبعد الهجوم على مها أحمد، دافع بعض الناس عنها وقالوا إن فعلًا مها أحمد في مجال الفن من قبل أمير كرارة وإن كل النجوم الكبار ابتدوا مشوارهم الفني ككومبارس، ولكن ده لا يقلل أبدًا من قيمتهم ولا يعني إنهم مش موهوبين. ولكن فضل حالة الغضب والكلام على السوشيال ميديا مستمرة لمدة أيام، وده اللي خلى الفنانة نشوى مصطفى تدخل لمحاولة تهدئة الجو العام والصلح بين جميع الأطراف، وطلبة منهم التماس الأعذار لبعض.
من جهة الفنان أمير كرارة، فكتب أخوه أحمد كرارة بوست دافع فيه عنه وقال إن كمية الناس اللي دافعت عن أمير كرارة تبين حب الناس ليه ووجود بعض القلوب الحاقدة اللي بتتمنى الأذى للناس الناجحة. وأكد إن الخير اللي بيعمله أمير هو سبب دفاع الناس عنه وعن أخلاقه اللي مكتبهاش أى شخص مجاملة ليه، ولكن اعترافًا بالحقيقة.
أما آخر من علق على الموضوع كانت الفنانة مريم سعيد صالح واللي كانت ضمن الفنانات اللي شاركوا في مسلسل نسل الأغراب، واتكلم إنها تعرضت للإهانات في كواليس المسلسل من المخرج محمد سامي بسبب ارتباكها خلال تصوير أحد المشاهد، وإن بنتها اللي كانت موجودة في الكواليس سمعت والدتها وهي بتتشتم وإن سبب سكوتها هو “أكل العيش”، وعدم التأكد من مساندة زملائها لها. وقالت إن بالرغم إنها تعاملت مع محمد سامي في أكثر من عمل قبل كده وإنه كان إنسان خلوق، إلا إنه في الفترة الأخيرة وبعد نجاحات كتير من أعماله، أصابه الغرور واتغيرت طريقة معاملته.
أما الفنان أحمد التهامي كان هو كمان من ضمن الفنانين اللي سعوا لإصلاح الأوضاع وقال إن الدنيا صعبة والناس تعبانة، وإن الناس لازم تستحمل بعضها شوية، وعلق الفنان أمير كرارة على منشور أحمد التهامي وقال إنه مش زعلان من مها أحمد وإن الموضوع بالنسبة له كأنه محصلش.
