بنزين ٩٨ هيوصل مصر في وقت قريب، بعد إعلان محطة Fuel Up بالشراكة مع “الوطنية”، في بنزينة وطنية القديمة الموجودة خلف كلية الشرطة في التجمع الأول، ده كمان غير إن المحطة فيها ١٤ نقطة شحن لسيارات الكهرباء من شركة “شاحن” المصرية، وكمان موجود فيها مطاعم وجبات سريعة وأماكن انتظار.. لكن خبر وصول ٩٨ كان غريب شوية وخلى ناس كتير تسأل، هو إيه الفرق بينه وبين بنزين ٩٢ أو ٩٥؟
لما دورنا على الفرق بين أنواع البنزين حسب اختلاف أرقامها، لقينا إن رقم الأوكتان -اللي بيتقال ٩٢ أو ٩٥ أو ٩٨- هو مقياس لمقاومة البنزين للانفجار، وكل ما رقم الأوكتان يزيد، بتزيد الفعالية. وده معناه إن ٩٨ أكثر استقرار ومقاومة، وهو الاختيار الأحسن لحماية محرك السيارة، وكمان هو الاختيار الأحسن لأداء السيارة، لكن مشكلته إنه هيتحرق بشكل أسرع.
سعره متوقع إنه هيكون أغلى، لحد دلوقتي ماتمش الإعلان عن سعره، لكنه معروف إنه مناسب لسيارات الأداء العالي والسيارات الرياضية المزودة بمحركات بتعمل بالبنزين والضغط المرتفع لإنه بيتميز بمستويات عالية من الأوكتان. كمان من الضروري قبل ما تستخدم بنزين ٩٨ لعربيتك، تتأكد من احتياطها لإجراء تعديلات الأول أو لأ، علشان يتناسب معاها البنزين ده.