الجسم الصحي مش مجرد حميات غذائية نستمر عليها شهرين ونزهق، ولكنه نظام حياة نمشي عليه طول حياتنا علشان نقدر فعلاً نوصل للجسم الصحي اللي بنحلم بيه. وأسما شريف منير عرفت ده وقررت تشجع الكل إنهم يمشوا في نفس الطريق، فبدأت بنفسها ونشرت صورة ليها قبل وبعد تظبيط أكلها، والفرق بصراحة كان كبير خصوصًا إن الفرق بين الصورتين 3 شهور بس.
إتكلمت أسماء عن إزاى قدرت تقوي من إرادتها وتلتزم مش بحمية غذائية ولكن بأكل معتدل تلتزم بيه مدى الحياة واللي هيحافظلها على جسم رشيق لأطول فترة ممكنة. مش بس كده لكن اتعلمت كمان إزاي تتعامل مع مشاعر معينة بتخلي الشخص يزود من أكله زي التوتر، وكيفية ضبطها، وبكده تتأكد إنها تبقى فاهمة طبيعة الجسم وأسباب زيادة الوزن علشان تتجنبها في المستقبل.
لجأت أسما لمساعدة أخصائية غذائية علشان تعملها نظام غذائي يناسب أسلوب حياتها وذوقها في الأكل ويساعدها تخسر وزن في وقت قصير ويشجعها إنها تستمر عليه. وكمان قررت إنها تشارك كل خطواتها في الرحلة دي مع متابعينها من خلال قناتها على اليوتيوب اللي هتسجل من خلالها كل التفاصيل والتغيرات اللي بتحصل مش بس في الجسم ولكن في بشرتها وشعرها اللي ناوية تهتم بيهم وتغذيهم أكتر. والهدف من مشاركة كل ده مع الناس هو تشجيع كل الستات اللي نفسها تخس وتمشي على نظام غذائي صحي، بس مش لاقيين اللي يحمسهم ويشجعهم على ده.