شوفنا تصنيف في مجلة أمريكية بيقول إن الرز والفاصوليا من ضمن أغرب أكلات بتتاكل مع بعض، وده خلّانا نفكر قد إيه الناس اللي بتشوف من برا مخدوعين وفاكرين إن الرز والفاصوليا -اللي يعتبروا أكلة تقليدية جدًا بالنسبة لنا- غريبة بالنسبة لهم للدرجة دي، وحابين نواجههم بالصدمة ونقول لهم بقى على الميكسات الغريبة اللي بجد.
مبدئيًا علشان نبقى متفقين، الليستة دي بناء على آراء أفراد من فريق سكوب، وتجاربهم هما والناس اللي يعرفوهم مع الأكل الغريب.
ساندوتش جبنة بالويفر
ده زميلة لتا شافته في ابتدائي، طفلة زميلتها كانت بتحب تجيب ساندوتشات الجبنة وتحط عليها بسكوت ويفر ويا سلام لو بالشوكولاتة، ووقتها كانت بستغرب منها جدًا بس كنا بشوف أغرب من ده يعني وعادي طالما هي مبسوطة. ممكن تجربوا الميكس ده؟
بيض بالعجوة
أول مرة نسمع الجملة دي كانت من زميلة لنا في المكتب شخصيًا، وبرغم صعوبة الجملة وصعوبة تخيلها، لكن اكتشفنا إن ناس كتير بتحب الأكلة دي وبالنسبة لهم مش ميكس غريب ولا حاجة. وأول ما كتبنا الجملة دي على جوجل لقينا شيفات كبار ومهمين في مجال الطبخ عملوها فعلًا، بس شخصيًا، مش حاسين إن عادي نجرب الميكس ده، وأنتم؟
بطاطس محمرة بالآيس كريم
مؤخرًا، السوشيال ميديا انتشر عليها الاعتراف ده من ناس كتير، وخصوا بالذكر مطعم بعينه، بيحبوا يجيبوا منه البطاطس المحمرة أو الفرايز، وبدل مثلًا ما يحطوها في صوص -زي أغلب الناس- بيحطوها في الآيس كريم.
ميكس البطاطس المحمرة والآيس كريم غريب، وبرغم كده الاعتراف ده لقى قبول من عدد كبير من الناس على السوشيال ميديا، اعترفوا هما كمان إنهم بيحبوه وبيتكسفوا يقولوا.
ممبار محشي رز بالكبدة
من غير غلط، دي أكلة ليبية معترف بها، لكن لما سمعنا عنها في مصر كان رد فعلنا غريب، يعني في الأساس ناس كتير مش بتحب الممبار، فأنت تحشيه رز مخلوط بالكبدة كمان؟ طب وهندخل الكبدة دي جوا الممبار ازاي؟ أسئلة كتير مش لاقيين لها إجابة، لو تعرف قل لنا.
سندوتش موز
ده بقى حطيناه في القايمة علشان الناس مستغرباه، لك احنا شخصيًا بنحبه عادي وبنزود عليه شوكولاتة كمان. عادي يعني فينو أو توست وموز وشوكولاتة، مش هيكون أغرب من ميكسات الحلو على الحادق أو ميكسات البيض والعجوة.
محشي شبت
في مصر بالذات، أي حاجة ممكن نشوفها يجي في بالنا نعملها محشي عادي، لأن المحشي مش بيقتصر على الباذنجان أو ورق العنب والكرنب بس، احنا بنحشي خس، بصل، بطاطس، حتى الطماطم ماسيبناهاش في حالها بنفتحها ونحشيها برضه، لكن نجيب ورق شبت ونحشيه؟ دي اللي كانت غريبة على ودننا وعينينا لما شوفناها في عزومة عائلية ولقينا ملفوف غريب، ولما سألنا إيه ده، الإجابة كانت “محشي شبت”
يعني مش بنكتفي بوجود الشبت نفسه في خلطة المحشي، لأ، تعالى هنحشيه هو كمان.
جبنة حادقة بالحلاوة الطحينية
ده كمان اتكسفنا نعترف به، بس عن تجربة شخصية يعني الميكس ده بيدي طعم آيس كريم شوية، لو الجبنة حادقة والحلاوة الطحينية معمولة بالسمسم مظبوط، هتحس إنه آيس كريم الغلابة.
بس ماننصحش بده لو هنتبع بروتوكول الأمهات في إن الحلاوة مع الجبنة الحادقة ممكن تسبب حمى، ومانعرفش حتى مصدر المعلومة دي إيه غير أمهاتنا.
لو فضلنا نزود في الليستة دي من هنا لبكرة مش هتخلص، علشان لسه في ساندوتشات مكرونة وشوربة بالرز وزبادي على سندوتشات وحاجات كتير من دي، تفتكروا إيه أغرب حاجة فيهم؟ وإيه منهم بتحبوا تاكلوه بس بتتكسفوا تقولوا؟ عمومًا بننصحكم ماتتكسفوش تقولوا يعني علشان خلاص كل شيء اتكشف وبان.