من سنين كتيرة، بدأ رامز جلال ومقالبه يكونوا جزء لا يتجزأ من رمضان.. بدأ الموضوع من أول رامز قلب الأسد اللي كان الضيوف بيتفتحوا الأسانسير علشان يلاقوا أسد قاعد قدامهم، ومن وقتها وبرامجه في تصاعد مستمر من حيث تخويف وترهيب الفنانين اللي بيتعمل فيهم المقالب.
وامبارح نشر رامز جلال البرومو لبرنامج المقالب بتاعه السنة دي في رمضان “رامز عقله طار” على قناة إم بي سي مصر. وطبعًا زيّ كل سنة، هيبدأ الجدل حوالين إذا كان تقديم والفُرجة على البرنامج صح ولا غلط، وهنشوف الناس بتتقسم زيّ كل سنة بين ناس بتطالب بوقف عرض برامجه اللي بيشوفوا إن اللي بيحصل فيها غير أخلاقي أو أدمي، وبين ناس تانية شايفة إن ده مجرد هزار تقيل وإن الفنانين بيوافقوا في النهاية فخلاص ماحدش متضرر. ولحد ما نقدر ندخل في النقاش ده بعد ما نتقرج على أول حلقة، تعالوا نشوف الإعلان والفنانين اللي كانوا ضحية رامز، ونسيبلكم انتوا الحكم.
الإعلان عدى المليون مشاهدة خلال ساعات قليلة وبقى تريندنج على جوجل. ومن خلال الإعلان قدرنا نشوف بعض الفنانين ولاعبي الكورة الكبار اللي هيظهروا في حلقات البرنامج زيّ محمد هنيدي، وأحمد مالك، وجميلة عوض، ودينا الشربيني، وكندة علوش، وحمادة هلال، وريم مصطفى، وسمية الخشاب، ونسرين طافش، ومعتصم النهار، وملك قورة، وحمو بيكا، ورمضان صبحي، وأحمد سعد، ومروان محسن، ومحمد مجدي قفشة، ومحمود عبد الرحيم “جنش”، ومحمد عبد الرحمن، ورحاب الجمل، وويزو، وكريم عفيفي، وأمينة، وإسلام إبراهيم، وطارق يحيي.
ده غير الفنانين اللي ماظهروش في الإعلان واللي هنتفاجيء بيهم وقت عرض حلقاتهم. إيه رأيكم في مقلب رامز السنة دي وهل شايفين إن المقلب مبالغ فيه ولا مجرد هزار وبرنامج ترفيهي هيسلي الناس في رمضان؟
