بين فيديوهات وقضايا: القصة الكاملة لخلاف عمرو أديب ومحمد رمضان

الخلاف في الكام ساعة اللي فاتوا بيزيد بين المذيع عمرو أديب والفنان محمد رمضان، وصل لتصريح عمرو أديب بإنه هيرفع قضية على محمد رمضان بسبب نشر رمضان لفيديوهات إساءة لعمرو أديب، والخلاف مستمر بقاله كذا يوم، بعد فيديو نزله محمد رمضان وهاجمه عمرو أديب على سلوكه، وبعدها محمد رمضان رد بفيديوهات من مشاهد من مسلسلاته بيرد بيها على عمرو أديب بسخرية، ووصل الخلاف لشدته لما عمرو أديب رد في الآخر بإنه هيرفع قضية على محمد رمضان، فتعالوا نشوف الموضوع ابتدى إزاي؟

بعد الحكم ضد محمد رمضان في قضية الطيار، واللي غرّم محمد رمضان بدفع تعويض 6 مليون جنيه للضرر اللي سببه للطيار، محمد رمضان بعدها بساعات نزل فيديو على صفحته، بيرمي فيه فلوس في الهوا وهو في البسين، والفيديو ده أثار جدل كبير والناس فهمته على إنه تحدي من محمد رمضان بعد الحكم عليه وإنه بيبين إنه مش هامه.

وبعدها، عمرو أديب في حلقة من برنامجه، هاجم محمد رمضان على تصرفه ده وقال إنه تصرف مستفز لشعب مصر.

بعد كده، محمد رمضان نزل فيديوهات على صفحته، بيرد فيها على عمرو أديب بمشاهد من مسلسلات ليه.

ورد عليه عمرو أديب في حلقته، وقال “لو محدش رباك أنا هربيك” وصرح بإنه هيرفع عليه قضية، ولو كسبها هياخد التعويض يتبرع بيه لمؤسسات خيرية، وإنه مش هيدخل في جدال “قليل الأدب”.

في نفس الوقت تقريبًا، محمد رمضان كان ضيف لبرنامج، وظهر بشخصية مسلسله الجديد، وقال تصريحات كتير ردًا على الجدل اللي أثاره في الفترة الأخيرة سواء بفيديو الفلوس، أو بتصريحاته عن بطولته لفيلم الملك أحمس، وقال تصريحات كتير، أبرزها كان: “فيديو الفلوس دعايا لأغنية إعلان عن منتج، واتصور قبل حكم قضية الطيار”.. “أنا ناجح مش كياد”.. “شخصية أحمس دي طموحي من أيام مسرح المدرسة، وأحمس ده بتاعنا كلنا، هو خال الممثل الزميل؟”.

آخر كلمة: ماتفوتوش قراءة: تجاوز الحد؟ غضب بسبب رد فعل محمد رمضان بعد تغريمه في قضية الطيار

تعليقات
Loading...